UMongameli Emmerson Mnangagwa uthi uhulumende uzimisele ukuthuthukisa isimo sezisebenzi.
Wethule lokhu ngoLwesine kumbiko wakhe oweState of the Nation Address ngesikhathi evula okusemthethweni isigaba sesithathu sedale lephalamende.
Amazwi kaMnangagwa uwethule ngesikhathi ababalisi bekhalala umsebenzi elizweni lonke jikelele bekhala ngeholo eliphansi.
Ababalisi bathi bafuna uhulumende abaholise amakhulu amahlanu amadola ngenyanga umuntu munye ngamunye.
“Kubabalisi bethu, abongi lezisebenzi zonke zikahulumende, sizakwenza esikwnelisayo ukuze isimo sempilo yabo sibe ngcono.”
Uqhubeke ethi uhulumende wakhe usephe uncedo ebantwini abafika inkulungwane ezingamakhulu ayisikhombisa -700,000 abaswela ukudla ngesikhathi uzulu ezivikela kumkhuhlane weCOVID-19.
Isikhulumeli senhlanganiso yababalisi eyeAmalgmated Rural Teachers Union, uMnu Nation Mudzitirwa, uthi bazamelela babone ukuthi uMnangagwa uzabenzelani.
“Siyathaba kakhulu ukuba umongameli uvumile ukuba isimo sethu siphansi kakhulu. Njengokuthembisa kwakhe, siyathemba ukuba uzangenela alungise indaba yeholo lababalisi lezinye izisebenzi.”
Kodwa ingcitshi ecubungula ezombusazwe, uMnu. Tafadzwa Chigandiwa, uthi akulanto ezakwenziwa nguMnangagwa.
“Uoongameli uyehluleka. Kumele ezame ukupha izisebenzi imali ecacayo ukuze labo baphile impilo engcono. Singakhangela udaba lwendlela zokuhambisa bengaphila ngcono.”
UMongameli Mnangagwa ubike njalo ukuthi uhulumende wakhe uselungise udaba lokuswelaka lwamafutha ezimota, esithi imali yeZimbabwe isilesisindo esimangalisayo nxa iqathaniswa lemali yakwamanye amazwe.
Lonyaka umbiko weState Nation of the Nation (SONA) wethulwe ebulenjini beInternet ngenxa yeziqondiso zokuvimba ukumemetheka kweCoronavirus kuthi amalunga edale lephalamende bebewulalele bebukele emtshineni yabo yamacomputer, kumalaptop lakumakhalekhukhwini.
UMongameli uthe imithetho elawula umsebenzi wentathelizindaba ethi iBroadcasting Services Act, iZimbabwe Media Commission Act leCyber Security and Data Protection Bill kumele ilungisiswe masinyane
Eminye imithetho athe kumele ilungiswe lidale lephalamende ngethi iFinancial Adjustment Bill, iConstitutional Amendment Number 11, iMarriages Bill, iPension and Providents Funds Bill, Man Power Planning and Development Bill leminye.
Kunje uhulumende usengezelele iholo lezIsebenzi zakhe yafika kunkulungwane ezilitshumi lambili zamadola eZimbabwe - RTGs$12,000 kusisebenzi esithola iholo eliphansi, elesisindo esingaba ngamadola edlula kancane alikhulu eMelika -$120.
Kodwa izisebenzi zithi limali incane kakhulu nxa kuqhathaniswa leholo ababelithola ngomnyaka ka 2017.