HOST: UMongameli Emmerson Mnangagwa ukhangelelwe ukuthi uzakwethula umbiko wakhe oqakathekileyo kusasa emhlanganweni weUnited Nations General Assembly owenzelwa ebulenjini bokuxhumana ngenxa yokumemetheka komkhuhlane weCOVID-19 emhlabeni wonke jikelele.
Inkokheli yamazwe atshiyeneyo ithumezela imibiko kunhlanganiso yeUnited Nations eNew York ephanyekwa ebulenjini bokuxhumana ibukelwe nguzulu.
Lokhu ngokokuqala ukuthi wenziwe ngendlela le umhlangano weUnited Nations General Assembly.
Kukhangelelwe ukuthi uMnangagwa uzakhuluma ngezijeziso zenotho ezafakelwa abanye abalandeli bebandla leZanu PF lamankampani okucatshangelwa ukuthi ancedisa uhulumende ekwephuleni amalungelo abantu.
UMnangagwa ukhangelelwe njalo ukuthi uzakhuluma ngomkhuhlane weCOVID-19, okuphathelane labezifazana lokunye.
UMnu. Joseph Tshuma, owebandla leZanu PF, uthi kuqakathekile ukuthi uMnangagwa akhulume ngezijeziso zenotho athi zibhidliza umnotho welizwe leZimbabwe.
Kodwa uMnu. Mathula Lusinga, ingcwethi kwezombangazwe, uthi uhulumende kaMnangagwa ukhuluma ngezijeziso lezi sonke isikhathi ekhohlwa ukuthi nguye okhahlameza uzulu.
Kusenjalo, uMongameli Donald Trump wakwele Melika uthi ilizwe leChina yilo elenze ukuthi umhlangano weUnited Nations General Assembly wenziwe ebulenjini bokuxhumana. UTrump wethule lokhu izolo kumbiko awuthumezele kunhlanganiso yeUnited Nations.