Lokhe kumemetheka ukuxokozela kubandla leZanu PF lapho abasekela umsekeli kamongameli uMnu. Emmerson Mnangagwa abathi ulelungelo lokuthatha isikhundla sikaMongameli Robert Mugabe engatshiya umsebenzi.
Bathi ihlekana labalandeli bebandla leli abazibiza ngokuthi yiGeneration 40 elilabantu abanjengo Mnu. Saviour Kasukuwere okhangelane lezombusazwe kubandla leli loProfessor Jonathan Moyo liyaphupha nxa licabanga ukuthi uMnangagwa kasoze athole isikhundla lesi.
Abalandela udaba lolu bathi okwenzakala kubandla leZanu PF kungenza ukuthi ibutho lelizwe, amapholisa lalawo awensitha ahluthune umbuso afakwe umuntu wabo esikhundleni lesi njengalokho okwenzakala eTanzania amabutho evuyo leZANLA aze asuse uMnu. Ndabaningi Sithole esikhundleni ngomnyaka ka1975 kulandela ukubhubha komkhokhei webandla leli uHerbert Chitepo eZambia.
Isenzo sabo lesi basibiza ngokuthi yiMgagao Declaration. Kwaba lokuthula kancane kulandela isinqumo lesi loba nje abanye bacina bevalelwa ezitokisini zebutho leZANLA.
Omunye walabo abathi uMnangagwa ufanele ukungena esikhundleni sikamongameli nguMnu. Energy Mutodi olesikhundla kubandla leZanu PF esabelweni seMashonaland East.
Ingcwethi kwezombusazwe zithi kungenzakala ukuthi ibutho lelizwe lingenele kudaba lolu lungaqhubeka lumemetheka.
Eyinye yazo ngusikhwicamfundo uProfessor Sabelo Gatsheni Ndlovu osekolitshini leUniversity of South Africa othe ibutho lilakho ukungenela ukwenzela ukulungisa udaba lozathatha isikhundla sikaMugabe.
Uthe ngengoba lokhu kwenzakala eMgagawo, kulakho ukwenzakala njalo ngenxa yokuxokozela okusebandleni elisubsayo.
