Okhankasela ukuthi uzulu avikeleke emkhuhlaneni weCovid 19, uMnu Meli Ndlovu, othi usuke ngebhasikili eGoli ngoMgqibelo emadabukakusa elubhekise koBulawayo, ufikile edolobheni leli ngoMvulo emini.
UNdlovu uthi uleqiniso lokuthi abantu bakuzwile ahamba ngakho ngoba ufisa ukuba uzulu azivikele kumkhuhlane weCOVID-19.
UNdlovu uthi okumsukumise phansi yikuthi ukhathazekile ngokumemetheka komkhuhlane weCovid 19 njalo ukhuthaza uzulu ukuthi ahlabe ijekiseni yeCovid 19 vaccine.
“Engigakugqugquzela abantu yikuthi baye vaccinater njalo asitsho ukuthi nxa suhlatshwe lijekiseni awusatholi umkhuhlane, abantu kumele bazi ukuthi kusamele bageze izandla, bagqoke amamask. Abanye bayala ukuhlatshwa, uyezwa abanye besithi ungahlatshwa awusazali kodwa kayisikho.”
UNdlovu ugcizelele wathi loluhambo belunzimba njalo uke wethuka lapho ehlangana lenyoka, ngaphandle kwalokhu uthi bekusina izulu njalo utshove ibhasikili lakhe lasebusuku.
Uhlangana lenkinga zomgwaqo omubi lapho esengene kwele Zimbabwe okudale ukuthi alale eGwanda ngemva kokuba engene emagodini wadutshukelwa ngamavili ebhasikili. Uqhubeke ngohambo lwakhe ngoMvulo ekuseni wayafika kahle koBulawayo.
UNdlovu uthi ebelenjongo yokufeza uhambo lwakhe phakathi kwamahola angamatshumi amabili lanhlanu - 24hrs kodwa kasaphumelelanga ngoba echithe isikhathi esinengi elungisisa amavili ebhasikili lakhe.
UNdlovu usuke kweleJohannesburg eSouth Africa ngoMgqibelo emadabukakusa ngehola lesithathu elubhekise koBulawayo eZimbabwe.
“Ngisuke ngatshayisa amapothole ma ngiphuma eBeitbridge ngisuke ngangena emagodini ngasengigijima eceleni kwesitalada bekule truck eyinye ebisiza amavili asesiba lamaqhuba. Isikhathi esinengi ngisiqede eToads sengilungisa amatyre ngoba bengile Spare Wheel elilodwa.”
Abanye abantu ebulenjini bebengakholwa ukuthi ngempela uNdlovu uzalufeza loluhambo kodwa uthi lokhu akumangalisi ngoba lomndeni wakhe ubungamthembi.
“I-speed engike ngahamba ngaso bengigijima ngo40km/hour kwezinye izindawo ibifika ku48km/hour njalo okungizwisa ubuhlungu yikuthi unkosikazi labodadewethu kanye labafowethu lindaba abazange bayivuma ukuthi ngize la.”
Bedlula inkulungwane ezimbili - 2,360 abaphethwe ngumkhuhlane weCovid-19 esabelweni seZansi yeMaNdebeleni kuthi abafika phose inkulungwane ezingamakhulu amabili 166,299 sebahlathswa ijekiseni yesibili yeCovid-19 vaccine.