Owake wasebenza esigodlweni selizwe leNetherlands kwele Zimbabwe, uMnu. Leon Hartwell, uthi ibandla leMDC elake lakhokhelwa ngumuyi uMorgan Tsvangirai lalulazwa yikulwisana kwamalunga alo, ubudlwangudlwangu kubandla leli, ukungahloniphi isisekelo sombuso webandla kanye lokungemukeli imibono etshiyeneyo.
UHartwell, osanda kuloba ugwalo olujulileyo olulesihloko esithi ‘What Went Wrong With Zimbabwe’s MDC-T’, uthi okunye njalo okwalulaza ibandla leli yikuthi kwakuqakathekiswa inkokheli kakhulu njalo kungabonakali ukuthi lalime ngaphi ibandla leli kwezomhlabathi owathathelwa abamhlophe lokunye okufanayo.
Uthi ibandla leli kalikhuthazi ingxoxo mpikiswano phakathi kwamalunga alo kuthi-ke njalo lizonda ukuchothozwa ngamaphephandaba lemisakwazo.
UHartwell okhulume labasakazi beStudio 7 kuhlelo lukazulu olwe Livetalk, uthi ibandla leli lehluleka lokuxoxisana okukhaliphileyo lomanyano weSouthern African Union ngomnyaka ka2013 kungakenziwa ukhetho elanqotshwa khona libandla leZanu PF.
Uthi kusobala ukuthi umuyi uTsvangirai wayesehluleka ukukhokhela abantu ngemfanelo.
“Ngifisa ukukubeka sobala ukuthi kangilizondi ibandla leli. Kangikaze ngisekele ibandla kwele Zimbabwe. Sengaloba okunengi ngodlakela olwenziwa libandla leZanu PF lokunye okufanayo. Ngabalenhlanhla ukuthi ngahlala kwele Zimbabwe okweminyaka emithathu ngazibonela ngamehlo ami la okwakusenzakala. Ngadaniswa kakhulu ngokwakusenzakala kubandla leMDC njalo lobukhokheli bukaTsvangirai.”
TEXT: UHartwell uthi ibandla leli laselimatasatasa ngesikhathi lingena kukhetho ngomnyaka ka2013.
“Ngaqalisa ukuloba ugwalo lolu ngisuka eZimbabwe. Ngafika kwele Zimbabwe kusanda kwenziwa umncintiswano weWorld Cup ngomnyaka ka2010 kwele South Africa. Ngasuka kwele Zimbabwe kusanda kwenziwa ukhetho ngomnyaka ka2013. Ngaqalisa ukuzidla ingqondo ngidingisisa ngokwehlela ibandla leMDC elaselilulazeke okumangalisayo. Lobanje ngangikwazi ukuthi ukhetho kalusoze luqhutshwe ngemfanelo, engikwaziyo yikuthi ibandla leMDC langena kukhetho selivele lizimvuthu.”
UHartwell owenza izifundo zePHD ekolitshini leStellenbosch kwele South Africa, uthi uTsvangirai ngomunye wabenza ukuthi ibandla leMDC lilulazeke.
“Kunzima esikhathini esinengi ukuthi umuntu akubeke njani nxa ekhuluma ngobukhokheli. Kodwa-ke engakubonayo kuTsvangirai yikuthi wayengenzi kahle ekukhokheleni uzulu. Lapha sikhuluma ngezinto ezinengi ezigoqela ukubabuthakathaka kwakhe kwezabomama njalo lezobudlawangudlwangu kubandla leMDC.”
UHartwell uthi banengi abakhokhela amabandla ezombusazwe eZimbabwe abanjengo Tsvangirai.
“Nxa ngicabanga ngodaba lolu ngiyabona ukuthi lokhu okwakusenzakala kubandla leMDC, kukhona njalo kumabandla atshiyeneyo anjenge leZanu PF. Lapha kumele ngikubeke kucace sibili ukuthi ibandla leMDC kalisilo lodwa elibhekane lenhlupho zonke lezi. Ungakhangela okwenziwa libandla leZanu PF kwedlula okwenziwa libandla leMDC. Umehluko yikuthi kwathi kubunjwa ibandla le MDC lahle lakhuluma ngokuvikela uzulu, ukuba lohulumende othakazelelwa ngabantu lokunye okufanayo. Ngakho-ke ibandla leMDC kwakungamelanga lenze lokhu okwenziwa libandla leZanu PF lamanye.”
UDokotela Nkululeko Sibanda, isikhulumeli sikaMnu. Nelson Chamisa, uthi loba nje ebona ukuthi uHartwell ubephehla ingxoxo mpikiswano ngokwenzakala kubandla leMDC-T, kusobala ukuthi abantu kabalandaba lokwake kwenzakala kubandla leMDC kudala.
Uthi abantu bakhangelele ukuvotela uhulumende omutsha hatshi okwenzakala kudala. UHartwell uthi uChamisa kumele afunde okunengi okwenzakala ibandla leli lisakhokhelwa nguTsvangirai ukwenzela ukuthi liphinde lithakazelelwe nguzulu.
