Bazondile abaxotshwa kudale lephalamende abathi ibandla leZanu PF liphehla ukungezwani kumabandla aphikisayo, agoqela eleMDC-T, People’s Democratic Party lamanye.
UMnu. Kucaca Phulu, osanda kususwa kudale lephalamende libandla elikhokhelwa nguNkosikazi Lucia Matibenga, uthi kabamazi uMnu. Benjamin Rukanda, owacela usomlomo wedale leli, uMnu. Jacob Mudenda, ukuba abike ukuthi iPDP isimxotsha labanye bakhe.
UPhulu uthi ibandla leZanu PF yilo eliphehla konke lokhu.
Kodwa uMnu. Nqobizitha Khumalo, isikhulumeli sebandla lePDP, uthi kumele uPhulu, uMnu. Tendai Biti labanye, abasanda kususwa edale lephalamende, bavume ukuthi bephula isisekelo sombuso webandla leli.
UMnu. Elifasi Mashaba, okubandla leZanu PF, uthi kabalasandla kulokhu okwenzakala kumabandla aphiisayo.
Uthi abahlaba umkhosi ngokuxotshwa kwabo kumele baye emthethwandaba.
Kodwa uMnu. Edwin Ndlovu, okubandla leMDC Alliance, uthi akulancedo ukuyaphanyeka lokhu emthethwandaba.
EleMelika lalo lithi ukuxotshwa kwamalunga edale lephalamende kwenziwa libandla leZanu PF elingafuni abantu abaliphikisayo eZimbabwe.
