Bayakhala abanye abakubandla leMDC-T ekhokhelwa nguMnu. Douglas Mwonzora abathi sokulungiselelwa ukuxotshisa edale lephalamende uNkosazana Thokozani Khupe labanye.
Abasekela uMwonzora bathi uMaKhupe ulwisana loMwonzora njalo lokhu ezondele ukuba wanqotshwa kukhetho lweExraordinary Congress lapho ayekhangelele ukuba uzakhokhela ibandla leli. Sekuxotshwe abanye emadolobheni okuthiwa basekela uMaKhupe.
Kulabanye njalo abaxotshiswa edale lephalamende libandla lika Mwonzora elathi babesekela ibandla leMDC Alliance elikhokhelwa nguMnu. Nelson Chamisa.
UMwonzora uthi uChamisa akumelanga asebenzise ibizo leli ngoba umthetho kawumvumeli. Ukuze sihlaziye okwenzakala khonamanje, sixoxe loMnu. Witness Dube, ophethe uhlangothi lokwethulwa kwemibiko kubandla leli, loMnu Discent Collins Bajila, osekela uChamisa.
UDube uthi abantu abaxotshiswa edale lephalamande lakumakhansili ngabephula iziqondiso zesisekelo sombuso webandla leMDC-T.
Uthi abalandela uChamisa ngabantu abangazi lutho ngoba benza okungekho emthethweni ngakho-ke bakhuluma amanga ngokwenzakala kubandla leMDC-T.
UBajila uthi kuyayangisa okwenzakala kubandla elikhokhelwa nguMwonzora elatshontsha amalunga edale lephalamende labakumakhansili elizweni lonke jikelele.
Uthi uDube wancintisa kukhetho olwenziwa ngomnyaka ka2018 ekubandla leMDC-T hatshi iMDC Alliance. Ngakho-ke uthi abantu laba badlelana lebandla elibusayo ngendlela eziphansi ukwenzela ukubhidliza elikhokhelwa nguChamisa.