Udaba lomkhokheli womanyano oweMovement for Democratic (MDC) Alliance lokuphikisa impumela yokhetho lokudinga umongameli alukhweze emthethwandaba waphezulu elizweni oweConstitutional Court soludale ukungahlaliseki kanye lokungathembi uhlelo lokuvota kuzulu weZimbabwe.
Ngakwelinye icele abahlaziya ezombusazwe bathi kababoni ukuthi umthethwandaba uzaphambana lesinqumo sekhomishini ebona ngezokhetho eye Zimbabwe Electoral Commission (ZEC).
Inengi labantu lithi kalisela themba lokuthi ukhetho lungaqutshwa kungela ngxabanxoza lokwethesana umlandu wokuqilibezela eZimbabwe.
Igqwetha elisebenza likoBulawayo njalo elindele ukugcotshwa njengelunga lephalamende eNkulumane uMnumzana Kucaca Phulu uthi idale eleConstitutional Court elilidale eliphezulu elizweni yilo elizanquma ukuthi kwenzakaleni phakathi kwensuku ezingamatshumi lane. Uthi bonke abancintisayo balakho ukuthi labo befake awabo amaphepha phambili kokuthi idale lihlale phansi lizwe wonke amacele.
Idale leSupreme Court lilamalunga ayisitshiyagalolunye, njalo uChief Justice Malaba nguye ozakhetha abahluleli abazatshutshisa loludaba.
UPhulu wengeze ethi idale lilembali yokulahla izindaba ngezizatho zokuthi kuyabe kulokunye okungaqondanga ethi nxa ekhangelisisa uChamisa ulendaba eqinileyo ngakho umthethwandaba akumelanga ulahle loludaba.
“Nxa ngikhangele mina ngibona engani UChamisa ulodaba oluqinileyo njalo ngibona engani idale akumelanga lilahle indaba ngenxa yamatechnicalities.”
Ocubungula ezombusazwe uMnu. Butler Tambo uthi umthethwanda lo ngeke uvumele okufunwa nguChamisa ngoba bezakuthi udaba lolu alulethwanga ngendlela eyiyo njalo lobufakazi alabo abeneli.
“Angikuboni kusenzakala khonokho ngoba lanxa bezimele bodwa omantshi ngabantu abenza umsebenzi kahle.”
Omunye njalo ohlaziya ezombusazwe umnumzana Zibusiso Masiye uthi leli lithuba eliqala elizweni lokuhlola ngeqiniso ukuthi ilizwe lengatsha zalo selikhululeke kangakanani kuqathaniswa lezombusazwe.
“Ngibona engani lithuba elikhulu lokuhlolisisa ukuthi ingatsha zelizwe ezeGovernance zikhululeke okunganani, nxa kuyikuthi amajudges ethu aseIndependent kuzabasobala ngendlela abazaphatha ngayo loludaba.”
Uzulu elizweni jikelele uselinde ngamehlo abomvu impumela yaloludaba lokuthi abone ukuthi imithethwandaba yelizweni izimele kumbe lokhe ithatha uhlangothi.
Umthetho omkhulu welizwe owesisekelo sombuso uvumela ukuphikiswa kwempumela kodwa leli lithuba lakuqala ekhethweni lapho okwenzakala khona kweleZimbabwe ngakho wonke umuntu wesaba ukuthi kuzenzakala njengesikhathini lapho okwaliwa khona ukuthonisiswa kungela sizatho.
Abanye abancintisayo labo kulolukhetho balayo imvumo yokubhalela umthethwandaba labo bezibika abakufunayo phambilini kokuthi umthethwandaba uzwe loludaba okuvezwe ngomunye wabancintisileyo okhokhela umanyano oweCoalition of Democrats, uMnu. Elton Mangoma, othi laye uzofaka awakhe amaphepha emthethwandaba.
Impumela yalomthethwandaba izavesa sobala ukulandelwa kwesisekelo sombuso lokuthi ilizwe selisesibangeni siphi sikhangele ekuzibuseni kwalo.