Umlimi omhlophe, uMnu. Martin Grobler, usexotshwe epulazini leProtea Valley eRuwa lapho abelime igwayi, umumbu lokunye njalo elenkomo ezedlula amakhulu amathathu.
UGrobler uxotshwe nguNkosikazi Ivy Rupindi, okuthiwa wanikwa ipulazi leli nguhulumende ngesikhathi abalwa impi yenkululeko labalandeli bebandla leZanu PF beqala ukuhluthuna amapulazi abamhlophe ngomnyaka ka2000.
UGrobler, owangena epulazini leli ngomnyaka lowo, uthi wayecele ukusebenzisa ipulazi leli kumnikazi owatshonayo.
Uthi kuyamangalisa ukuthi abantu abanjengaye lokhu besuswa emapulazini loba uhulumende esanda kuthembisa ukuthi uzahlawula abathathelwa amapulazi ngemali efika amabhiliyoni amathathu lengxenye – 3,5 billion.
“Kuyadanisa lokhu ngoba uhlelo lokuthathela abantu umhlabathi lokhu luqhubekela phambili.”
Uthi okwamanje usedinga indawo yamadlelo enkomo zakhe.
“Kumele ngidingele inkomo zami amadlela ngoba akwenzi ukuthi ngizithengise khathesi. Ngizakhulumisana labanye. Ngizazithengisa sezinonile hatshi khathesi.”
Kubikwa ukuthi uRupinda, osebenza kuhlangothi lukahulumande olubona ngezokulima, uncediswe ngumthethwandaba ukuba angene epulazini leli. Izithunywa zomthethwandaba zilahlele phandle kwendlu impahla yonke kaGrobler zamtshela ukuthi aphume ephele kuleyondawo izolo.
Uhulumende usanda kwethula umbiko othi usahlolisisa udaba lolu. URupinda walile ukukhuluma lentathelizindaba yeStudio 7 esithi kumele ofisa ukwazi ngokwenzakalayo akhulume lomphathintambo wezokulima, uMnu. Anxious Masuka.
Kasenelisanga ukukhuluma loMasuka obengaphenduli umakhalekhukhwini wakhe. Abamhlophe abafika inkulungwane ezine lengxenye – 4,500 bahluthunelwa amapulazi kusukela ngomnyaka ka2000.
Amanye amapulazi la ayelabanikazi abalezivumelwano lohulumende weZimbabwe lamanye amazwe okwakungavelanga athathelwe abamhlophe.
