Uhulumende kaMongameli Emmerson Mnangagwa uthi bonke abantu abafelwa yizihlobo ngesikhathi sombhuqazwe weGukurahundi sebevunyelwa ukuthatha amaphepha okuzalwa amaBirth Certificates komsitheli kungelakuthandabuza.
Lokhu kwethulwe namuhla koBulawayo nguNkosikazi Virginia Mabhiza, unobhala wohlangothi lukahulumende oluphathelane lezemithetho.
UNkosikazi Mabhiza uthe uthunywe nguMnangagwa ukuthi azekwethula umbiko lo kulandela umhlangano asanda kuwenza labamele inhlanganiso ezizimele zodwa edolobheni leli abakumbuthano obizwa ngokuthi yiMatabeleland Collective.
Ugcizelele esithi abafelwa yizihlobo sebelakho ukuthola amaphepha alabo ababhubhayo amaDeath Certificates.
UNkosikazi Mabhiza uthe sebetshele lohlangothi olunika abantu izithupha ukuthi kumele bancedise labo abalahlekelwa ngabazali lezihlobo ngesikhathi sombhuqazwe weGukurahundi ukuthi bathole amaphepha la aqakathekileyo.
Uphinde wathi abantu bakhuthazwa ukuthi bakhulume ngombhuqazwe weGukurahundi bakhululekile njalo uhulumende uzabaphathisa ukuthi bathole amaphepha okuzalwa lawalabo ababulaw ngesikhathi sombhuqazwe weGukurahundi.
Kulabantu abanengi eMatabeleland leNkabazwe abakhala ngokuthi kabanelisi ukuthola amaphepha la kulandela ukufelwa ngabazali lezihlobo ngesikhathi sombhuqazwe weGukurahundi.
Owayengumongameli uMnu. Robert Mugabe wasebenzisa ibutho leFifth Brigade ezabelweni lezi ezangingaphansi kwebandla leZapu eyayikhokhelwa ngumuyi uJoshua Nkomo owayecatshangelwa ukuthi wasekela abahlamuki ababelwisana lohulumende wakhe. UNkomo wakuphika lokhu wacina ebaleka elizweni kulandela ukuhlaselwa kwendlu yakhe koBulawayo libutho leli.
Abantu abazwe umbiko lo batshele umsakazo weStudio 7 ukuthi bayakuthakazelela lokhu loba abanye besithi kumele ukulumende avume ukuthi wabulala abantu mahlayana kusukela ngomnyaka ka1982 kusiyafika umnyaka ka1987.
