Kulabanye abantu abathukuthele okumangalisayo ngokuvalelwa kwenduna uNhlanhayamangwe Khayisa Ndiweni, owetheswa icala lokubambisana labantu abangamatshumi amabili ukuthi badilize umgcele womunzi wendoda eyethola unkosikazi wayo esemacansini lesinye isakhamuzi.
UNdiweni, owathonisa icala leli wathatha isinqumo sokuthi ikhosikazi likaMbele liyelaywa kibo ngokubanjwa xhaka lisemacansini lomunye umuntu, uthi icala leli ladalwa ngabantu abakubandla leZanu PF abalwisana laye.
UNdiweni uvalelelwe entilongweni yeKhami Remand Prison. Uzagwetshwa namuhla koBulawayo.
Ingcwethi kwezamasiko esintu, uMnu.Mqondobanzi Magonya, uthi uNdiweni ufela ukuphikisa uhulumende obusayo hatshi ukuthi wadiliza uthango lwendoda eyeyibhekane lohlupho lomfazi omehlo mehlo.
