Kuhlelo lwezizalwane zeZimbabwe ezihlala emazweni, ngoLwesithathu sixoxe ngokwenziwa yilabo abahlala eBhilithane abancedisa intandane ekhaya.
Izizalwane lezi okwamanje zikhangelane lenhlupho zabantwana abambalwa eZamanyoni, esabelweni seMatabeleland South, lapho abantwana laba abaphiwa izembatho zezikolo, amabhuku okufunda, izicathulo lokunye okufunakalayo.
Omunye walaba abenza lokhu nguNkosikazi Nomsa Nekevane othi sebecabanga ukubumba inhlanganiso ezimele yodwa ezabizwa ngokuthi yiMopane Foundation.
UNekevane uthi sebebanengi abantwana abadinga uncedo eKezi ngenxa yomkhuhlane onjengeAIDS osuqede abantu abanengi.
Uthi bakhangelele ukuthi inhlanganiso yabo izabe isenelisa ukudinga imali lokunye okufunwa ngabantwana besikolo abadinga uncedo.
Okwamanje banceda abantwana abayisitshiyangalombili. Omunye wabo usefunda esikolo semfundo ephezulu.
