Kuhlelo lwamasiko lenhlalakahle yabantu, ngoLwesibili sikhuluma ngembali kamuyi umnumzana Taffi Moyo obhubhe koBulawayo ngeviki ephelileyo eseleminyaka elikhulu lasificaminwe mbili – 108.
UMoyo ubesaziwa kakhulu kwele Zimbabwe ikakhulu kwezamasiko, ezombangazwe lomdlalo wenguqu.
Wathi esiba leminyaka elikhulu wenza idili elikhulu koBulawayo lapho anconywa okumangalisayo nguMongameli Robert Mugabe owathi wanceda kakhulu ilizwe ngesikhathi sempi yenkululeko.
Umuyi wayenika abalwa impi yenkululeko uncedo lwempahla etshiyeneyo lemali. UMoyo, okade elemabhizimusi atshiyeneyo koBulawayo, waphiwa isicoco saphezulu salelidolobho sokukhululeka ukuthi ayenza santando njengoba wayengumuntu wabantu eseFreedom of the City.
Imisebenzi yakhe kayipheleli lapho. Wayengomunye wabantu abavuselela iqembu lenguqu – ele Highlanders Football Club – eyatshiywa ngamadodana enkosi uMzilikazi kaMatshobana - uAlbert lo Rhodes Khumalo – abasuka elizweni baya kwele South Africa.
Ngesikhathi leso, iqembu leli lalisaziwa ngokuthi yiLions Football Club.
Umuyi walithatha iqembu leli walifaka endlini yakhe elokitshini leMzilikazi lapho abadlali ababegqokela khona bengakayi enkundleni yenguqu.
Ukuze sihlaziye imbali kamuyi, uGibbs Dube weStudio 7 ukhulume lomntaka Moyo, uBeauty Moyo loMnu. Peter Zwide KaLanga Khumalo ingcwethi kwezamasiko esintu.
