Abenhlanganiso yentathelizindaba eye Zimbabwe Union of Journalist balobelana isivumelwano labohlangothi lweRadiation Protection Authority of Zimbabwe, esijonge ukuphathisa intatheli ukuthi zibe lolwazi olwaneleyo ekulobeni okuyikho phezu kwendaba zaloluhlangothi lokuba luphathisa kanjani uzulu.
Amacele womabili avumelene ukuba lelinyathelo lizaphathisa ukutholisa ulwazi oluyilo kuzulu, athathe izinqumo esazi, ukuyadinga usizo esibhedlela, lapho esecabangela ukuba uselayo imvukuzane lokuba indlela yokwelatshwa ngeRadiation isebenza njani emkhuhlaneni obikwa osuthatha imiphefumulo yabanengi ukwedlula eminye imikhuhlane emhlabeni jikelele.
Lezi nhlangothi zibe lombuthano wokulobelana lesi sivumelwano seminyaka emithathu, emkhosini owenzelwe eWarren Park Hills Golf Course ngoLwesihlanu.
Emazwini akhe, umqondisi weRadiation Protection of Zimbabwe umnumzana Reward Sevela, uthi lumanyano, uzaphathisa ekuthini uzulu aluthole ulwazi oluzamenza azwisise phezu kwenkinga ezingalethwa yikuba umuntu engavikelekanga kuloluhlobo lwamandla avelela aweradiation le, okuvame ukubangela imikhuhlane yemvukuzane.
Umgcinisihlalo we Radiation Protection Authority of Zimbabwe eyingcwethi njalo kwezokwelatshwa kwemvukuzane u Dr. Ntokozo Ndlovu uthi kuqakathekile ukusebenzelana lokhu ukuze uzulu afinyelele ulwazi oluyilo phezu kwemihlobo yeRadiation, ukuba itholakala kuziphi indawo kanye lokuba asetshenziswa kanjani ekudingeni ukuthi umuntu ulemvukuzane loba hatshi kanye lakwelatshweni kwayo.
Kuqakathekile ukuba kube lokusebenzelana ngokwaneleyo ukusabalalisa ulwazi phezu kwemihlobo yemvukuzane ehlukeneyo.
Unobhla jikelele we ZUJ, uFoster Dongozi, olobe lesi sivumelwano emele intathelizindaba, uthi bakubone kufanele basebenzelane labe Radiation Protection Authority of Zimbabwe, ekuthini intathelizindaba zithole ulwazi olumqoka nxa ziloba ngezeRadiation.
Uqonqosela intathelizindaba uDongozi, phezu kokuqakatheka kokudingisisa phezu kwendaba eziloba ngazo, zilobe zilolwazi olwaneleyo ngendlela ezaphathisa uzulu lapho eseluthola luvelela kumaphephandaba, emisakazweni, omabonakude lezinye indlela zebulenjini esezisetshenziswa kulezi nsuku.
Lumkhosi wokulobelana phansi lesi sivumelwano seminyaka emithathu okwamanje, ungenwe zingcwethi kwezempilakahle, izisebenzi ehlangothini lukahulumende lwe Radiation Protection Authority of Zimbabwe, inhlanganiso ezizisebenza lozulu zizimele kundaba zezempilakahle kanye lazo intathelizindaba.