Abapheka isinkwa kubikwa ukuthi bafuna ukuthi kukhuphulwe intengo yaso iyefika amadola amane kumbe amahlanu.
Iphephandaba leSunday Mail libika ukuthi amankampani apheka isinkwa esibiza idola letshumi - $1.10 cents okwamanje bathi intengo le yenza ukuthi balahlekelwa yimali nxa besithengisa.
Bathi kufunakala izigidi ezine zamadola - $4 million – ngenyanga yokuthi bathenge okokuphekisa isinkwa nyanga zonke kodwa okwamanje ibhanga leReserve Bank of Zimbabwe libapha ingcosana yemali le.
Sehlulekile ukukhuluma leziphathamandla zikahulumende ngodaba lolu.
Abamele izisebenzi abanjengo Mnu. Japhet Moyo, owenhlanganiso yeZimbabwe Congress of Trade Unions uthi abantu kabasoze benelise ukuthenga isinkwa kungakhuphulwa intengo yaso.
Ingcwethi kwezombusazwe, uMnu. Clement Moyo, uthi akumangalisi okukhulunywa ngabathenga isinkwa ngoba kasisatholakali ezitolo.
UMnu. Belive Gaule webandla leZanu PF uthi uhulumende uyazama ukulungisa umnotho welizwe lobanje kulabanye abantu abadonsela muva.Kubikwa ukuthi abathenga impuphu yokubheka isinkwa labasiphakayo bayakhulumisana ngokukhuphulwa kwentengo yesinkwa.
