Izakhamizi zikhala ezimathonsi ngokuqonga kwentengo yenhlanyelo lamakhuba okulima ngesikhathi kulungiselelwa ukulima.
Inhlanyelo elesisisindo sama khilogramu alitshumi - i10kg - isibiza amadola alikhulu letshumi - $110 - kuthi elesisindo samakhilogramu angamatshumi amabili lanhlanu i25kg yona sibiza amadola angamakhulu amabili lamatshumi amahlanu - $250 - ezitolo zeGwanda.
Ikhuba lokulima lona libiza amadola angamakhulu amane lamatshumi amane -$450.
Lintengo isitshiye izakhamizi zibambe owangaphansi njalo zisevalweni lokuhlaselwa yindlala ngenxa yokuthi zizehluleka ukulima lonyaka.
UMnu. Ellias Lujika Dube, isakhamuzi seSwitsha eGaranyemba eGwanda South, uthi ukuqonga kwentengo yenhlanyelo lokhu kuzadala ukuthi inengi labantu lingalimi lonyaka.
“Nxa izinto sezikhwele zifike lapho umuntu angenelisi khona siyabe singasakwazi ukuthi singaqonda ngaphi ikakhulu lonyaka abantu bengazange bathola lutho abanye besidla okokunika njengokukhwela kwezinto ikakhulu inhlanyelo kuzayenza abantu abanengi bengalimi lonyaka ngoba lanxa kade ulakho okuyimadlana kokuthi uyethenga nxa inhlanyelo sifika kubo $200 vele uzabe uzayithenga ngani, uyabe ungasoze uyithenge.”
UMnu. Gabriel Moyo, ohlala eMawane, uthi lobanje uhulumende elohlelo lokupha izakhamizi inhlanyelo, linhlanyelo ibingabiwa kahle okudala ukuthi inengi lingayizuzi.
“Abanye batholile inhlanyelo njalo abanye abayitholanga, inhlanyelo ibilamabizo abantu abafa kudala pho nxa sinqansile inhlanyelo yafika kulesi sibanga eyiso sona akula muntu ozayithola sokuyikufa kwabantu ngoba abasoze bakwanise ukulima.Amabele akula vele umnyaka lo odlulileyo asilimanga asilalutho besithembele ukuthi engxenye inhlanyelo ingaba nganeno abantu bathenge yona uhulumende lo uyanakekela abantu kumbe vele laye sefuna ukuthi abantu bahle bafe kumbe ilizwe lalo lihle livalwe?.”
Amazwi akhe agcizelelwe nguMnu. Patrick Marupi oweFumukwe othi inengi lezakhamizi alisoze liyenelise ukuthenga linhlanyelo njalo kuyadingakala ukuthi uhulumende angenele kuloludaba ngokuphangisa.
“Ukukhwela kwenhlanyelo lapha kuzakhamizi sokusiba nzima ukuthi izakhamizi zingalima njani ngoba akula sakhamuzi esingayathenga inhlanyelo eye $100 so izakhamizi sezithwele nzima ziyakhuluma ukuthi hayi uhulumende kake abone iplan ngoba ukulima bazalima nzima.”
Ngaphandle kokuqonga kwentengo yenhlanyelo, uMarupi uthi ukuqonga kwentengo yempahla ezitolo sokutshiye izakhamizi zibhekane lendlala eyesabekayo.
“Itshukela i2kg yi$5 impuphu i50kg yi$60. So, sokwenza izakhamizi zithwale nzima kakhulu ngama prices abasenelisi ukuthi bengaphila ngendlela yokuthi intengo ekhona iyasinda izakhamizi sokwenza izakhamizi ziphile nzima. Heyi bukhokheli sithwele nzima kuyini elingasenzela khona.”
Inengi lezakhamizi esabelweni seZansi yeMaNdebeleni kalivunanga kahle lonyaka ngenxa yokungani ngemfanelo kwezulu nyakenye. Okwamanje inengi lezakhamizi liphila ngoncedo lomumbu osuka kuhulumende.
Ukuqonga kwentengo yenhlanyelo lokhu sokumangalise abanengi ikakhulu ngalesisikhathi uhulumende kaMongameli Emmerson Mnangagwa ephethe esithi uzagxila kakhulu kwezokulima ukuze athuthukise umnotho wakuleli.
