Ilizwe leZimbabwe ngoLwesine linanza usuku lukazibuse kulabanye abakhonona ngokugugudeka komnotho okubenza ukuthi bengenelisi ukuphila ngemfanelo.
Abantu abanengi bakhangelelwe ukuthi bazahamba emkhosini wokunanza usuku lolu eNational Sports Stadium eHarare lezinye indawo ezabelweni.
UMongameli Emmerson Mnangagwa ukhangelelwe ukuthi uzakwethuka umbiko oqakathekileyo ozabalwa njalo yiziphathamandla zikahulumende endaweni ezitshiyeneyo.
Ibandla leZanu PF letheswa umlandu wokwehluleka ukubusa osokwenze ukuthi abantu abanengi baphile ngokucela ukudla lokunye.
Kulabanye abathi uhulumende kaMnangagwa ufana xathu lokaMnu. Robert Mugabe, owasuswa esikhundleni libutho ngomnyaka ka2017.
Loba abantu bebhekane lenkinga ezinengi, ibandla leZanu PF likhuthaza uzulu ukuthi athakazelele usuku lukazibuse. UNkosazana Stars Thebe Mathe, omele iNkayi South edale lephalamende ekubandla leZanu PF, uthi uzibuse ngowabantu bonke hatshi abasekela uhulumende kaMnangagwa.
Kodwa-ke abaphikisa uhulumende kaMnangagwa bathi akulalutho lokungathakazelelwa nguzulu lonyaka ngoba abantu bahlupheka okumangalisayo eZimbabwe.
Omunye wabalombono lo nguMnu. Andrew Nyathi owalwa impi yenkululeko ekuvuyo leZIPRA othi kayisikho lokhu abakulwela empini yenkululeko.
Umkhosi wokuthakazelelwa uzibuse lonyaka wenziwa ngaphansi kwesihloko esithi ‘Zimbabwe @39—Embracing Devolution for Vision 2030’.
Ilizwe leZimbabwe selibuse libandla elilodwa selokhu lathola uzibuse. Akwaziwa ukuthi uMnangagwa uzaguqula okwenzakala khonamanje eZimbabwe njengoba umnotho ulokhu uqhubekela phambili ugugudeka.
