Abalamabhizimusi ezimota ezithwala uzulu bacela uhulumende abavumele ukusebenza bezimele hatshi ukuba yingxenye yenkampani yeZimbabwe United Passenger Company – iZUPCO.
Amapholisa koBulawayo athi asebambe imitshova efika amakhulu amane – 400 engasebenzi okusemthethweni evalelwe enkambeni enkulu edolobheni leli.
Isikhulumeli samapholisa koBulawayo, uInspector Abednico Ncube, utshele intathelizindaba koBulawayo ukuthi izimota ezingabhaliswanga kunkampani yeZUPCO kazisoze zivunyelwe ukuthwala abantu.
Uthi lokhu kwethulwa okusemthethweni nguhulumende ngakho-ke kumele bonke abalezimota ezithwala abantu belandele umthetho.
Kodwa abalamabhizimusi la bathi kabafuni ukusebenze bephansi kwenkampani yeZUPCO. Omunye wabo ngoMnu. Mbonisi Msimanga.
UMnu. Bulisani Nxumalo, olemota ethwala abantu, uthi bathwele nzima koBulawayo.
UNxumalo uthi bagijimisana lamapholise sonke isikhathi ngoba kabakabhalisi kunkampani yeZUPCO.
UMnu. Joseph Tshuma, okubandla leZanu PF, uthi abalemitshova kufanele belandele okufiswa nguhulumende.
UInspector Ncube uthi okuqakathekileyo yikuthi abalezimota lezi balandele imithetho yelizwe hatshi ukwenza santando. Uhulumende uthi izimota ezithwala abantu kumele zisebenze siphansi kwenkampani yeZUPCO ukwenzela ukuthi kuvinjwe ukumemetheka kwegciwane leCOVID-19.
