Idale lePolitiburo lebandla leZanu PF lokhe lihlafuna indaba ezithile emhlanganweni walo oqalise lamuhla emini yantambama, okugoqela ukuthakazelela ilanga lokuzalwa kukamongameli Mugabe ngeviki ezayo kanye lohlelo lweZIMASSET.
Loba singenelisanga ukukhuluma lesikhulumeli sebandla leZanu PF, uMnu. Simon Khaya Moyo, abazi ngokwenzakalayo emhlanganweni lo bathi idale leli lihlafuna indaba ezigoqela uhlelo lokuthuthukisa umnotho welizwe olweZIMASSET kanye lokudlelana kweZimbabwe leleChina.
Okunye njalo okukhanya kuhluzwa lidale leli yikulwisana ebandleni leZanu PF okwenza ukuthi uNkosikazi Joice Mujuru owayengumsekeli kamongameli welizwe labanye bakhe baxtshwe nyakenye becatshangelwa ukuthi babefuna ukususa uMugabe esikhundleni.
Ukuze sihlaziye udaba lolu, uGibbs Dube weStudio 7 ukhulume loMnu. Abednico Bhebhe unobhala wezenhlelo zikazulu webandla leMDC-T othe ibandla leli lichitha isikhathi esinengi likhuluma ngokungasoze kuncede uzulu.
Sixoxe njalo loMnu. Morris Ngwenya umsekeli webandla leZanu PF othe kulungile ukuthi idale leli lihlafune udaba lokuzalwa kukaMugabe.
Uphinde wathi idale leli lenze kahle ukukhuluma ngobudlelwano lelizwe leChina njalo lohlelo lweZIMASSET.
Abatsha abangamalunga amabandla aphikisayo bathi abasoze bephatheke kulanga lokuthakazelela ukuzalwa kukamongameli Robert Mugabe edolobheni leVictoria Falls ngeviki ezayo.
Umgcinisihlalo wogatsha lwabatsha kunamdla leZANU PF esigabeni seMatabeleland North uMnu. Tamuka Nyoni utshele iStudio 7 ukuthi ibandla lakhe linxusa abatsha abavela ingqe kuliphi ibandla kumbe inhlanganiso ukuthi behlanze idolobho leVictoria Falls mhlaka 21 kuyonale inyanga ukunanza lelilanga.
UMnu. Descent Bajila, isiphathamandla secele leMDC elikhokhelwa nguMnu. Welshman Ncube kugatsha lwabatsha uchsisele uSithandekile Mhlanga weStudio 7 ukuthi akukho okwenziwa ngumongameli Mugabe okungaba yisibonelo kwabasakhulayo.