EleZimbabwe ngoLwezine limanyane lamazwe womhlaba wonke jikelele ekunanzeni ukulondolozwa kwamalungelo kazulu ngosuku lwe International Human Rights Day, ingcwethi kwezombusazwe labalwela amalungelo oluntu besithi uhulumende kaMongameli Emmerson Mnangagwa akaqhubanga kahle ekuhlonipheni amalungelo oluntu lonyaka.
Isikhulumeli senhlanganiso emela amalungelo oluntu, uMnu. Marvelous Khumalo, uthi uhulumende wehlulekile ukuhlonipha amalungelo oluntu lonyaka.
“Kumnyaka lo oka2020 esikuwo, akulanto njengama Zimbabweans esingahlala phansi sisithi siyathokoza nxa sikhangela ilanga lamalungelo. Amalungelo abantu abanengi sibone engahlonitshwa nguhulumende.”
Lokhu kusekelwe ngunobhala wabatsha kubandla leMDC Alliance, uMnu. Gift Ostallos Siziba, othi abatsha kumele balwele amalungelo abo.
Ummeli weHwange Central, uMnu. Daniel Molokele, uthi kumele uhulumende ahloniphe imithetho ngoba isisekelo sombuso weZimbabwe.
“Thina njengabantu baseZimbabwe silodaba olokhulu nxa kukhulunywa ngamalungelo oluntu. Siphila sisesaba, nxa ulesikhalazo ulakho ukubotshwa uswele ibheyili amalanga amanengi”
Kodwa uhulumende uyakulandula lokhu esithi abantu abathi bayahlukunyezwa ngabantu ababhalwa ngamazwe afana lele Melika ukuze lengenze izijeziso zomnotho eziphiwa ele Zimbabwe.
Umsekeli womphathintambo obona ngomsebenzi wabatsha kubandla leZANU PF, uMnu. Mabutho Moyo, uthi uhulumende uzimisele ukuhlonipha amalungelo oluntu.
“Uhulumende usebenza gadalala ukuthi kubanakale ukuthi amalungelo abantu ayananzelelwa. Ukukhitshwa kwemethetho encidezela amalungelo abantu, kuyatshengisa ukuzimisela kwakhe. Sikhangele ukuthi uzaqhubeka esenza njalo.”
Inhlanganiso ezibona ngamalungelo oluntu ezifana leZimbabwe Lawyers for Human Rights zithi abantu ababotshiweyo lonyaka lokhe bebanengi kakhuliu nxa kuqathaniswa lesikhathi kuseselo Mongameli Robert Mugabe esikhundleni.