Ibandla leMovement for Democratic Change elikhokhelwa nguMnu. Nelson Chamisa lithi abantu kumele bazihlalele endlini zabo ngoba sebegonjolozelwe ngamapholisa labanye abagcina umthetho eHarare lapho obekumele ukuthi amalunga ebandla leli atshengisele emigwaqweni esola isimo esibi somnotho eZimbabwe.
Lokhu kwethulwe ngesikhathi amagqwetha ebandla leli esanda kuphuma emthethwandaba lapho abedinga imvumo yeHigh Court ukuthi ibandla leMDC litshengisele emigwaqweni eHarare.
Amapholisa avimbe ukutshengisela lokhu ngoLwesine ntambama esebenzisa ezinye iziqa somthetho wePublic Order and Security Act (POSA). Umthethwandaba weHigh Court uthe kumele ibandla leli liyedinga imvumo kumantshi.
Kodwa-ke uMnu. Tendai Biti, uMnu. Innocent Gonese labanye abamele iMDC bathe kabasoze bakwenze lokhu ngoba idolobho leHarare selisezandleni zabagcina umthetho abagoqela amapholisa, amasotsha labanye.
Isikhulumeli sebandla leMDC, uMnu. Daniel Molokele, ukhuthaze uzulu ukuthi ahlale ezindlini ngoba amapholisa adla amahabula eHarare lezinye indawo.
Uthe kusobala ukuthi idolobho leli kalisekho ezandleni zikazulu ngoba amapholisa avimba lokuthi abantu bangenelisi ukuyafika endaweni lapho obekumele abantu bahlangane khona batshengisele ngokuthula.
Loba kunjalo, bathe kuzaqhubekela phambili ukutshengisela emigwaqweni kwamanye amadolobho ngeviki ezayo.
Kasenelisanga ukukhuluma lamapholisa ngodaba lolu abikwa ukuthi asebophe abantu abanengi okumangalisayo eHarare lobanje uzulu evinjwe ukungena emigwaqweni.