Idale leHigh Court selimise imizamo yamapholisa yokufuna ukuthatha ingwalo zeEconet Wireless ezijulileyo ezilamagama abantu bonke abasebenzisa omakhalekhukhwini benkampani le kanye lezinye eziveza ukusetshenziswa kwemali emikambo yemali enjenge EcoCash.
Amapholisa athola imvumo kumantshi ukuba athathe ingwalo lezi esenzela ukuphendla ukungethembeki okuthiwa kwenziwa yinkampani le.
Kodwa iEconet Wireless iyakuphika ukuthi ithenga ithengisa imali yakwamanye amazwe emikambo yayo yemali yenze santando, osokudale ukuthi idola leZimbabwe lifane lezichibi.
Inkampani yezindaba eyeReuters ibika ukuthi amagqwetha amele iEconet Wireless atshele umthethwandaba ukuthi akucaci okudingwa ngamapholisa ngakho-ke imvumo abayithole emthethwandaba ophansi kumele ibekwe eceleni.
Ithi uMahluli wedale leHigh Court, uJustice Edith Mushore, uvumelane lokwethulwe ngamagqwetha enkampani le esithi okudingwa ngamapholisa kungaphendlwa esikhathini esilandelayo hatshi okwamanje.
Uhulumende usanda kuvimba umkambo wemali oweEcoCash leminye esithi kudala ukuba imali yakwele Zimbabwe iwohloke isisindo nxa kuqathaniswa lemali yakwamanye amazwe, okugoqela idola leMelika.
Inhlanganiso ezizimeleyo, ezigoqela eyeMedia Institute of Southern Africa – Zimbabwe, zivuse umhlonga zasekela iEconet zisithi akumelanga inike amapholisa lokhu abakufunayo ngoba kwephula umthetho wamankampani leminye imithetho yelizwe.