Izizalwane zeZimbabwe ezihlala kwele South Africa ezidabuka ezigabeni zeMaNdebeleni zithi ukunanzwa kweUnity Day, yikuchitha isikhathi ngoba ngeke kwaba lokubambana labo abathinteka ngobhuqhazwe oweGukurahundi bengahlawulwanga labakwenzayo bengaxolisanga loba ukujeziswa.
AbeZimbabwe laba bathi leli langa eliqale ukunanzwa ngo1987 ngesikhathi amabandla iPF Zapu leZanu ekhumisana umlotha, yimizamo yokukhohlisa labo ababulawelwa, batshiselwa imizi abanye balinyazwa ngombuqazwe weGukurahundi.
Umcwaningi eUniversity yeWitwatersrand eJohannesburg, uMnu. Jetro Mpofu, utshele umbuthano oqoqwe ngabenhlanganiso yeGukurahundi Survivors for Justice ukuthi uhulumende angazikhohlisi ngokuthi kungaba lokumanyana okugcweleyo eZimbabwe.
“Laba abayenzayo iGukurahundi they are politically benefitting from it. Labathengisayo babalekela phakathi lokhe bephakathi. Lokungesabeki kwenu njengamavictims kuyaqhubeka alesabeki. Ledisposession, displacement libalekela ilizwe lokhe labalekayo. Iculture yeZimbabwe ireflector ilizwe elaqunywayo.
UMpofu uthe okudanisayo yikuthi zinengi impawu ezikhombisa ukuthi umbuqazwelo ulokhu uqhubeka kwele Mandebeleni kodwa sekusetshenziswa ezinye indlela ezicatshileyo. Uthi okunye kwalokhu ngezomnotho ezimbi kakhulu kwele MaNdebeleni nxa kuqathaniswa lezinye izabelo elizweni.
Uthi ukungahlonitshwa kolimi lweSiNdebele osekuze kwafika ekuthini kuthunyelwe ababalisi abangazi ngitsho lesaga esisodwa luphawu lokuthi bakhona abafuna sife siphele isizwe samaNdebele.
Ekhuluma emkhosini munye Induna yakwaMthwakazi, uThulani Jubane, uthi imizamo kahulumende yokuzikhethela abakhokhela ukusonjululwa kodaba lweGukurahundi ngenhloso yokuthi abantu bakhohlwe ngalo umbuqazwe ayingeke isebenze.
“Kumele bakhumbule ukuthi umenzi uyakhohlwa umenziwa akakhohlwa. Nxa becabanga ukuthi sesaphola ngoba kwathiwa forgive and forget. How can you forget into ebuhlungu kangaka abazali bakho betshiselwa endlini ubhekile ubabona behlaba umkhosi emalangabini omlilo besekuthiwa forgive and forget. Leyo ngeke yenzeke.”
Umgcinisihlalo wenhlanganiso ye Gukurahundi Survivours for Justice, uNkosazana Nomagugu Khumalo, uthi ukunyamalala kwabantu, ukutshiswa kwemizi, ukudlwengulwa kwabesifazana, lokudutshulwa kwabantu umphakathi ubhekile, akusonto engalungiswa ngobukhokheli bukahulumende owayekhokhela lesi sihluku.
“Amavictims aweGukurahundi labo abafayo lalabo abasaphila bayakhala la lamhlanje bekhalela ukulungiswa okungakenzeki. Ngokubona kwethu umbhuqazwe awukapheli. Watshintsha indlela owakusenza ngayo. Lanxa yasayinwa iunity accord mhlaka 22 December, ayikho iunity eyaba khona?”
Kodwake enkulumeni yakhe yokuthakazelela lolusuku lamhlanje, uMongameli Emmerson Mnangagwa, uncome leli langa lomanyano wathi selenze umsebenzi omkhulu wokumanyanisa isizwe. Uthi osekufanele khathesi yikuthi lisuswe embalini yokulwisana okwabakhona lifakwe kumanyano wenhlelo zentuthuko.
Uthe yena ngokwakhe mathupha uzimisele ukwenza konke akwenelisayo, kugoqela ukukhulumisana labantu abonelwayo ngenhloso yokukhipha intukuthelo lebunye ububi obatshiywa ngumbhuqazwe.
Uhulumende kaMnangagwa wabumba iqula leNational Peace and Reconciliation Commission le Matabeleland Collective ngenhloso yokuthi kuncediswe bonke abatshaphazwa yiGukurahundi. Kodwake inengi labantu abathokozi ngamalunga ale ikhomishini langokuthi yabunjwa nguhulumende hatshi umphakathi owonelwayo.