Abalamabhizimusi ezimota ezithwala uzulu eZimbabwe lakwele South Africa bathi sebephelelwe yimali ngenxa yokuvalwa kwemingcele lemizamo kahulumende eyokuthi basebenze bephansi kwenkampani yeZimbabwe United Passenger Company (ZUPCO).
Bathi sokulomnyaka izimota zabo zingathwali abantu zisuka eZimbabwe zisiya kwele South Africa.
Bagcizelele besithi uhulumende uyala ukubanika incwadi zokusebenza lobanje bedlelana lalabo abakwele South Africa.
Bayakhala abalezimota emadolobheni ezifanayo abathi amapholisa asebethathela izimota esithi kumele basebenze bephansi kwenkampani yeZUPCO.
UMnu. July Moyo, umphathintambo kahulumende obona ngezamadolobho lezabelo, utshele iphephandaba leSunday Mail ukuthi kumele bonke abalezimota ezithwala uzulu basebenze bephansi kwenkampani le.
UMoyo uthi lalabo abathwala abantwana bezikolo kumele bedlelane leZUPCO.
Uthi kabasoze bavumele izimota ezithwala abantu ezingekho engwalweni zeZUPCO ezisemigwaqweni.
UMnu. Khumbula Sibanda, okunhlanganiso yabalezimota ezithwala abantu zisuka eZimbabwe zisiya kwele South Africa eyeZimbabwe International Long Distance Taxis Association, uthi kuyamangalisa okwenziwa nguhulumende ngenxa yokuthi amabhasi athwala abantu abanengi abedlula lokhu okufunakala phansi kweziqondiso zokuvimba ukumemetheka kwegciwane leCOVID-19.
USibanda uthi kulezimota ezifika phose amatshumi amahlantu – 45 ezimiswe nguhulumende osokusenza ukuthi abanikazi bahlupheke kakhulu.
Abalezimota babesenza imali efika phose inkulungwane ezingamatshumi amahlanu zama rand – R49,000 ngenyanga.
