Uhulumende wakwele Zimbabwe ukhuthaza abantu ukuba beqhubekela phambili belandela iziqondiso zokuzivikela kumkhuhlane weCOVID-19 ngesikhathi lisehla inani lababanjwa ligciwane leCoronavirus elizweni.
UDokotela Agnes Mahomva, okhokhela inhlelo zokulwisana lomkhuhlane weCOVID-19 ewofisini kamongameli, uthi liyehla inani labantu abathapha igciwane leCOVID-19. UDokotela Mahomva uthi loba kunjalo kumele uzulu alandele iziqondiso zokuzivikela kumkhuhlane lo ezethulwa yinhlanganiso eyeWorld Health Organization.
“Singathintani mahlayana, sigeze izandla zethu ngamanzi alesepa sikhathi sonke, siyehlatshwa phezu kwakho konke. Kumele sibone ukuba ziyalandelwa ngemfanelo zonke lezo iziqondiso ezabekwayo nxa singabazimiseleyo njalo singabafuna luphele masinya lolubhubhane."
Uhlangothi lukahulumende olwezempilakahle lubika ukuba kulabantu abane ababulewe ngimkhuhlane weCOVID-19 izolo eZimabwe kwathi abedlula amakhulu amabili – 218 bahlolwe batholakala belegciwane leCoronavirus. Uzulu yena lanxa esithi uyakuzwisisa lokho okukhulunywa nguhulumende ukuba beqhubeke bezinakekela, uthi indlala yiyo esibangela ukuba bephule ezinye zalezo ziqondiso.
Omunye walabo abathi umangoye uselala eziko selokhe lolubhubhane lwaqhamuka ngoMbimbitho ngomnyaka ka 2020, nguNkosikazi Zandile Nkala, isakhamuzi seAlexandra Park, eHarare.
“Lokuthi sizincedise njani njengabantu abaziphilisayo. So vele, ilizwe lethu vele kalilawo umsebenzi ngaphandle kokuthi siziphilise. Sithwele nzima ngokusebenza, sithwele nzima kakhulu, kakhulu, sithwele nzima shame. Sicela ukuthi, heyi ingani bengasikhangelela ukuze lathi sibe kwazi ukuncedisa abantwana, siyakhala kakhulu ngabantwana, siyakhala shame.”
UNkosikazi Nkala uthi abantu abanengi badinga indlela zokuziphilisa ngesikhathi kumemetheka igciwane leCOVID-19.
“Abantu banengi kakhulu lapha abaphila ngokuziphilisa, ngokuthengisa, ngokuzisebenza kodwa kuyasiphazamisa futhi kuLockdown ngoba kuyaphangiswa ukuvalwa njalo lemali iyabe ingekho, ikakhulu thina lapha esidayisa ezitaladeni, hayi, siyahlukumezeka asikwazi ukuthi senzeni, amapholisa ayasihlupha, i-City Council iyasihlupha so sicina singasakwazi ukuthi kumele senzeni.
UMnu. Bukhosi Nkiwane, ohlala koBulawayo, uthi kumele kuvulwe konke elizweni, imisebenzi yenziwe njalo abantwana bebuyele ezikolo njengalokho obekusenziwa lungakaqhamuki lolubhubhane.
“Ukuba sesikolo kuyabalibazisa kwesinye isikhathi balibale ngokuthi abanye bacina sebesenza into zokuganga ngenxa yokuthi abasela lutho abalwenzayo, at their age, betshona behlezi bengenzi lutho. Siyakwazi ukuthi sizabe sibafuqa njengabazali ukuthi bebe bebala, besezindlini lokusebenzisa amafoni bebala, besenza yonke into ezinjalo but ukuba sesikolo, kuqakathekile. We need ukuthi abantwana babuyele ezikolo, beyekwenza physical education. ”
Kodwa eyinye ingcwethi kwezempilakahle, uDokotela Mandela Ncube, ukhuthaza uzulu ukuba aqhubekele phambili ezinakekela, okugoqela ukuhlatshwa ijekiseni yokuzivikela kumkhuhlane weCOVID-19.
“I-COVID-19 iyenza njenge flu, ayibangelwa yi-Bacteria, ibangelwa yi-Virus but asikatholi ukuthi ingelathwa njani. Akukabi le treatment so into esingaba khona yikuthi abayenelisa ukuhlatshwa kabahambe bahlatshwe, ukuze bengatholi umkhuhlane lowu kalula. ”
Kulabantu abedlula inkulungwane ezingamakhulu amabili – 228,179 asebehlolwe kusukela ngoMbimbitho ngomnyaka ka 2020 batholakala belegciwane leCOVID-19 eZimbabwe. Asebephephe kumkhuhlane lo bedlula kancane isilinganiso esifanayo – 212,993. Umkhuhlane weCOVID-19 sowabulala abantu abedlula inkulungwane ezinhlanu eZimbabwe 5,292 kusukela ngomnyaka 2020.
