Owalwa impi yenkululeko, uMnu. Frederick Mutanda, uthi uMongameli Emmerson Mnangagwa lezinye iziphathamandla zikahulumende lezebandla leZanu PF, yibo abathume abasakhulayo ukuthi bemkhahlameze epulazini lakhe eMashonaland West kulandela ukuphikisa kwakhe ukuba kwengezwe iminyaka emihlanu yokuthi umahluli omkhulu welizwe, uChief Justice Luke Malaba, ahlale esikhundleni okweminyaka emihlanu.
UMutanda uthi abasakhulayo laba bangene epulazini lakhe ngoLwesibili. Uthi usekhulumisana labakubandla leZanu PF kanye labakuhulumende ngodaba lolu. Waphanyeka udaba luka Malaba emthethwandaba ebambisana lenhlanganiso ezimbalwa.
Uhulumende wasebenzisa umthetho omutsha oweZimbabwe Constitution Amendment (Number 2) Act ekwengezeni iminyaka yokuthi uMalaba ahlale esikhundleni.
Okwamanje uhulumende uyakuphikisa okwethulwa ngabahluli bedale leHigh Court abathi uMnangagwa kalandelanga imithetho yelizwe ngokwengeza okweminyaka emihlanu ukuba uMalaba ahlale esikhundleni.
Sehlulekile ukuxoxa ngodaba lolu loMnu. George Charamba, isikhulumeli sikaMnangagwa, kanye loNkosikazi Monica Mutsvangwa, okuhlangothi olubona ngokwethulwa kwemibiko, ngoba bebengaphenduli omakhalekhukhwini babo.