Inhlanganiso ezitshiyeneyo sezidinga ukudla, ingubo, imithi, amatende lokunye kokunceda abantu abasendaweni ezimbalwa eBinga abalemizi ekhukhulwe zimpophoma zamanzi kuze kune izulu elikhulu okwamalanga amathathu.
UMfundisi Josias Mudenda, owebandla leMethodist Church, uthi badinga impahla ezaphiwa abantu abedlula ikhulu lamatshumi amabili ababhidlizelwe imiza njalo kwakhukhulwa ukudla kwabo lezifuyo zimpophoma zamanzi.
UMudenda uthi amabele ezakhamizi lawo akhukhulwe ngamanzi ngesikhathi bekukhangelelwe ukuthi bengavuna okuthe xaxa lonyaka kulandela iminyaka emine yendlala.
INsungwale ngeyinye yendawo okune khona izulu lesikhukhula lapho okubikwa ukuba kubhubhe umuntu oyedwa kwathi inengi lalahlekelwa zimpahla.
UMudenda ukhuthaza abantu ukuba bancede ababhekane lengozi yezulu lesikhukhula.
