Eminyakeni edluleyo kulamazwe ayeyinhlekisa eZimbabwe ngenxa yokuwa kwenotho yawo, uzulu wakuleli engazi ukuthi koze kumfice laye osokumele azibuze ukuthi zifundo bani angazifunda kulawo mazwe ukuze ilizwe liphume ekubhidlikeni kwenotho elikilo.
Kulesikhathi lapho uzulu wakuleli owayekhangela omakhelwane abeZambia ahlekele esikhewini engazi ukuthi kusasa kuyizolo sobohla manyosi.
Lamuhla sokumele ilizwe likhangele amazwe la, lidingisise ukuthi wona aphuma njani kuloludubo nanku phela indlela ibuzwa kwabaphambili.
UNkosazana Martha Phiri, owenza izifundo zenotho, uthi wakhula ilizwe leZambia liyinhlekisa kodwa lamhla banengi asebephephela kilo.
Nxa kukhangelwa leli lizwe uthi kusobala ukuthi lingalungisa ezombusazwe, ezenotho lazo ziyalunga ngakho akulungiswe indlela ilizwe elibuswa ngayo nxa kukhangelelwe inguquko.
Umhlaba wake wangena esikhathini esinzima kunotho esaziwa ngokuthi yiGreat Depression eyahlasela lamazwe athuthukileyo afana leMelika, iNgilandi labo Japan.
UMnumzana Butler Tambo yingcwethi ekucubunguleni kunhlanganiso ye Policy Research Institute of Zimbabwe. Uthi nxa kukhangelwa lesisikhathi kusobala ukuthi izinqumo ezithile zilakho ukubulala inotho yelizwe ikakhulu nxa kukhangelwa ukwabiwa komhlabathi kuleli kanye lokusa inotho yelizwe kwabensundu.
Isikhathi okubekwe ngaso lezizinqumo, uthi yikho okubulele inotho yelizwe ngoba bekuyisikhathi ilizwe kumele livulele imingcele yalo kubosomabhizimisi lemali yakwamanye amazwe iForeign Direct Investment.
Nxa imithetho le ingaguqulwanga uthi ilizwe lingeke likhangelele uncedo kunhlanganiso ezifana leInternational Monetary Fund le World Bank ngoba livele lilezikwelede ezinkulu elehluleka ukuzibhadala.
UNkosikazi Musa Nyoni, umongameli wenhlanganiso yabazisebenzayo koBulawayo, iZimbabwe Chamber of Informal Economy Association, uthi inotho yelizwe izathuthuka kuphela lapho uhulumende angaqala ukudala imisebenzi uzulu asebenze.
Omunye njalo ocubungula inotho yelizwe, uNkosazana Abigail Sikhosana, uthi nxa kukhangelwa amazwe enelisa ukuvuka kwabafileyo, kumele ilizwe liqakathekise ukuvuselela amankampani alungisa impahla yokuthengisa phandle kwelizwe njenge Zisco Steel liphinde livuselele uLoliwe ukuze athwale impahla lula ngoba intengo yempahla yakuleli iphezulu ngoba ithwalwa ngomgwaqo kulokuthi ithwalwe yinjanji elentengo ephansi njalo ingabulali imigwaqo.
Esikhathini esinengi uzulu wakuleli ophandle kwesigodlo iHarare ukhala ngokuthi kungani zonke izinqumo zithathwa khona ezinye izigaba zingaphiwa amandla okuzibusa.
Ingcwethi kwezokubuswa kwelizwe, uMnumzana Butholezwe Ncube, uthi ilizwe kumele labe amandla kuzabelo, amabhanga enelise ukuthatha izinqumo eziqintini akuzo ukuthi anike bani imali, asekele iphi inkampani hatshi ukuthi izinqumo lezi zithathwe ngabantu abakhatshana abangazwisisi okwenzakala ezabelweni okuyikho okubulele ilizwe.
Umnumzana Tambo uthi kumele njalo kukhangelisiswe indleko zokuboleka imali kuleli ngoba iyadula kakhulu emabhanga okwenza amankampani ehluleke ukuyibusela lalapho ethe aboleka aze avale. Lokhu uthi kwenziwa yikuthi imali ebhoda elizweni isilutshwane kakhulu.
Nxa kukhangelwa ukuthi vele ilizwe langena njani kuloludubo ukuze lulungiswe ngoba phela akugobo lingeqondiswe, ingcitshi zithi kugoqela ukwabiwa kwenhlabathi, ukunika abalwela inkululeko amaqubaquba ezimali lokusa inotho kwabensundu kanye lemicimbicimbi eyayisenziwa libhanga lesizwe ngaphansi kowayengumqondisi walo uDr. Gideon Gono ebalisa ukudinda imali zikhathi zonke.
ZIthi okunye njalo yikuthengela abantu inqola lamathilakitha kanye lokwehlisa intengo yempahla iBACOSSI lokuboleka izikwelede zingabhadalwa, ngezinye zembangela zokubhidlika kwenotho yelizwe.
Nxa kukhangelwa amazwe azikhupha kuloludaba, kuyadingeka ukuthi eleZimbabwe lilungise ezombangazwe, lisuse izinqumo ezivalela ukungena kwemali yakwamanye amazwe, kudalwe imisebenzi emitsha njalo kuvuselelwe ubudlelwano obuhle lamazwe asentshonalanga.
Lanxa kunjalo, uzulu ukhangelele ukuthi luzaphela loludubo lokubhidlika kwenotho, ngoba lwaphela komakhelwane eZambia, lwaphela langesikhathi seGreat Depression emazweni athuthukileyo emhlabeni wonke jikelele, nanku phela abadala bayatsho ukuthi okungapheliyo kuyahlola njalo imihlolo layo iyaphela.