UMongameli Emmerson Mnangagwa usekhuthaze inhlanganiso yamazwe wonke omhlaba eyeUnited Nations ukuba incedise ekwesuleni izijeziso zenotho ezafakelwa inkokheli yebandla leZanu PF ngamazwe entshonalanga ngoba uhulumende wakhe unanza amalungelo kazulu, ukhathalela abesifazana, uthuthukisa umnotho welizwe njalo usedlelana kahle labamhlophe abathathelwa amapulazi kusukela ngomnyaka ka2000.
UMnangagwa wethule lokhu ngoLwesine kusihlwa emhlanganweni weUnited Nations General Assembly owenzelwa ebulanjini bokuxhumana ngenxa yokumemetheka komkhuhlane weCOVID-19. Uthe izijeziso zenotho kazilunganga.
“Izijeziso zenotho ezingekho emthethweni sezikezakhulunywa ngunobhala jikelele wenhlanganiso yeUnited Nations labanye bakhe ababona ngokweziphepheli, ukudla lokunye. Izijeziso lezi zephula imithetho yomhlaba wonke jikelele njalo zenza ukuba ilizwe leZimbabwe lingathuthuki ngemfaneli, ikakhulu ukuthi siyenze inhlelo zeSustainable Development. Ngakho-ke sifisa ukuthi iGeneral Assembly ikhulume kakhulu ngezijeziso zenotho lezi.”
Uthe ilizwe leZimbabwe kalephuli amalungelo kazulu.
“Uhulumende wami uyazama ukuthi abantu bakwamanye amazwe bengathwali nzima nxa befisa ukuvula amabhizimusi elizweni. Siyalandela isisekelo sombuso. Lokhu yikho okwenza ukuthi silobelane isivumelwano labalimi abathathelwa umhlabathi. Sikhangelele ukuthi umhlaba wonke jikelele uzasincedise ukuba sidinge imali yokuhlawula abalimi laba.”
Njengamazwe wonke omhlaba jikelele, uthe ilizwe leZimbabwe lilwisana lokumemetheka komkhuhlane weCOVID-19.
“Uhulumende wami uyazama njalo ukuthi alwisana lomkhuhlane weCOVID-19 sisebenzisa iziqondiso zomanyano womhlaba wonke jikele iWorld Health Organization. Uhulumende wami wethulela uzulu imali efika phose amabhiliyoni angamatshumi amabili amadola - $18 billion Zimbabwe dollars eyokuncedisa abathwele nzima.”
Abanye abalalele umbiko kaMnangagwa bathe uyitshaye ekhaleni. Omunye wabo nguMnu. Believe Gaule webandla leZanu PF othi abamhlophe bajezise ilizwe leZimbabwe kulandela ukuthathelwa umhlabathi kwabanye babo.
Lokhu kusekelwe nguMnu. Innocent Ndibali webandla leEconomic Freedom Fighters Zimbabwe, othi kumele kwesulwe izijeziso zenotho. Uthi loba kunjalo kumele uhulumende kaMnangagwa engakhahlamezi uzulu.
Ingcwethi kwezombusazwe, uMnu. Busani Ntini, uthi kuyamangalisa ukuthi uhulumende weZimbabwe udinga imali yokuhlawula abamhlophe abathathelwa umhlabathi.
UMngangagwa uphinde wathi ilizwe lakhe lilwela amalungelo abomama.
“Uhulumende wami uyazama ukukhathalela abesifazana. Sesile Zimbabwe Gender Commission emunyethwe kusisekelo sombuso welizwe njalo sesiyethule imithetho evimba ukukhahlanyezwa kwabesifazane okunjengokwendiswa kwabantwana abangamankazana besakhula lokwaba ilifa. Silebhanga lokunceda abesifazana.”
Kodwa uNkosazana Nokuthula Adonsi, ohlaziya ezombangwazwe, uyakuphikisa lokhu. Uthi uhulumende weZimbabwe uthwalise nzima abesifazana abamphikisayo.
UMnangagwa, owangena esikhundleni sikamongameli ngomnyaka ka2017 wancintisa kukhetho ngomnyaka ka2018, kuthiwa ukhahlameza amalungelo kazulu. Uyakuphika lokhu.
