Bayakhala okumangalisayo abantu eZimbabwe abathi ilizwe liphethwe kubi libandla leZanu PF elanqoba kukhetho olwenziwa nyakenye ngoNtulikazi.
Kulandela ukhetho olulempumela eyaphikiswa emthethwandaba libandla leMDC elikhokhelwa nguMnu. Nelson Chamisa, akuqedakali okwenzakala elizweni lapho izisebenzi zikahulumende ezifuna ukuholiswa ngamadola eMelika.
Uhulumende utshaya phansi ngenduku esithi izisebenzi lezi kazisose ziholiswe ngamadola ngoba ilizwe kalilamali.
Abantu abanengi bakhala ngokugugudeka komnotho lokubuswa ngoncindezelo nguhulumende kaMongameli Emmerson Mnangagwa abathi uyafana xhathu lokaMnu. Robert Mugabe, owasuswa embusweni ngomnyaka ka2017.
Kambe uhulumende kaMnangagwa ulamandla na wokulungisa ezombusazwe elizweni ukwenzela ukuthi abantu baphile kahle? UMnu. Joseph Tshuma, okudale leCentral Committee kubandla leZanu PF uthi uhulumende kabukelanga nje umnotho welizwe ubhidlika.
Kodwa-ke uNkosazana Thabitha Khumalo, umgcinisihlalo webandla leMDC elikhokhelwa nguMnu. Nelson Chamisa, uthi selehlulekile ibandla elibusayo kwele Zimbabwe elangena esikhundleni ngokuqilibezela.
