UMongameli Emmerson Mnangagwa ukhangelelwe ukuthi ngoLwesibili uzakwethula umbiko omayelana lokukhulunywe ngabafundisi beRoma abathi uhulumende wephula amalungelo abantu, kugcwele ubukhohlakali eZimbabwe, abantu babotshwa mahlayana lokunye.
Umabhalane kahulumende obona ngokwethulwa kwemibiko, uMnu. Nick Mangwana, uthi uMnangagwa uzakhuluma okujulileyo ngencwadi elotshwe ngabafundisi abakhulu beRoma abathi kuqakathekile ukuthi baveze ububi bonke elizweni njengalokhu okwenziwa nguJeremiah eBhayibhilini labanye.
UMangwana wethule umbiko lo ebulenjini bokuxhumana obeTwitter lapho angavezanga lutho ngokuzakhulunywa nguMnangagwa.
Okwamanje kulabantu abanengi abathi uNkosikazi Monica Mutsvangwa kumele atshiye umsebenzi ngenxa yokuthi uthethise uMfundisi Robert Christopher Ndlovu, umkhokheli wabafundisi beRoba abakuhlanganiso yeRoman Catholic Bishops Conference, elobe ugwalo olujulileyo ngokwenzakala eZimbabwe.
UNkosikazi Mutsvangwa uthi uNdlovu ngumuntu omele aMaNdebele abayingcosana kwele Zimbabwe.
Abantu abanengi bathi uNkosikazi Mutsvangwa ukhulumele eceleni okungenza aMaNdebele laMaShona babulalane.