Amaphepha aphanyekwe emthethwandaba nguMnu. Obert Mpofu, omele uMongameli Emmerson Mnangagwa labanye kudaba lokungena kuka Mnangagwa esikhundleni esiphezulu sikanobhala jikelele kubandla leli, aveza ukuba uMnangagwa akumelanga abotshiswe ngabantu eZimbabwe.
Iphephandaba leNewsHawks kanye leSunday Mail abika ukuba uMpofu, obona ngokuqhutshwa kwenhlelo zonke kubandla leZanu PF, uphanyeke ngoLwesihlanu amaphepha okuzama ukuvimba ukususwa kuka Mnangagwa esikhundleni okudingwa nguMnu. Sybeth Musengezi emthethwandaba oweHigh Court.
UMusengezi uthi uMnangagwa wakhethwa okungekho emthethweni ngoLwezi ngomnyaka ka2017 kulandela ukuhluthunwa kwentambo zombuso libutho lincedisana loMnangagwa labanye.
UMpofu uthi uMnangagwa uvikelwa yisisekelo sombuso welizwe ukuba engabotshiswa. Ngakho-ke uthi akumelanga umthethwandaba oweHigh Court uthonise uMnangagwa.
UMusengezi uthi umthetho kumele usetshenziswe ngemfanelo ukwenzela ukuba uMnangagwa asuswe esikhundleni kufakwe umuntu okhethwe ngamalunga eZanu PF.
Uthi ngamanga aluhlaza tshoko akhulunywa nguMpofu ukuba kasilolunga lebandla elibusayo. Omunye wabasekela okwenziwa nguMusengezi nguMnu. Ntokozo Msipha, okunhlanganiso eyeTyson Wabantu, ekhankasela ukuba uMnu. Saviour Kasukuwere angene esikhundleni sikamongameli.
Kodwa uMnu. Believe Gaule, okubandla leZanu PF, uthi alulamnkantsho udaba luka Musengezi olusemthethwandaba.
UMnangagwa wakhethwa lidale leZanU PF Central Committee ukuba angene esikhundleni kulandela ukususwa kuka Mugabe ngenkani esikhundleni. Ibutho lahluthuna umbuso lisithi kulabantu abagangileyo ababegombolozele uMugabe.
