Izulu lesikhukhula uCyclone Idai selibulele abantu abafika phose ikhulu – 98 – kulabangamakhulu amabili lasikhombisa okubikwa ukuthi kababonakeli.
UMnu. Nick Mangwana, okuhlangothi lukahulumende olwethula imibiko, uthi kulabantu abangamatshumi amane lambili – 42 – abasesihlengeni eChimanimani lapho okune izulu elikhulu okumangalisayo labhidliza izakhiwo ezinjenge zindlu, imigwaqo lamabholoho.
UMangwana uthi uMongameli Emmerson Mnangagwa ukhangelelwe ukuthi uzakwethekelela indawo le kanye leChipinge namuhla.
UMnangagwa uzabe ehamba lomsekeli wakhe uRetired General Constantino Chiwenga lezinye iziphathamandla zikahulumende. Kulabantu abanengi abachothoza uhulumende kaMnangagwa abathi ubengazimiselanga ukubhekana lezulu lesikhukhula leli elibulele abantu eMozambique leMalawi.
Omunye wabachothoza uhulumende kaMnangagwa nguMnu. Sibasa Tshuma, ohlala eFilabusi esabelweni seMatabeleland South, othi kuyayangisa okwenziwa nguhulumende.
Kodwa-ke uMnu. Believe Gaule webandla leZanu PF uthi uhulumende kaMnangagwa uzama ngamandla wonke ukuthi ancede abantu ababhekane lomonakalo owenziwe lizulu lesiphepho uCyclone Idai.
UNkosazana Sally Mlambo, okunhlanganiso yePlatform for Youth Development esabelweni seManicaland lapho okulomonakalo omangalisayo, uthi kuzwisa ubuhlungu okwehlele abantu endaweni ezinjenge Chipinge, Chimanimani leMutare lapho obekulezulu elikhulu lamanzi amanengi.
