UMongameli Donald Trump uthi akukho okungavimba ilizwe leMelika ukuthi lithuthuke ngemfanelo nxa abantu belizwe leli bedonsa ndawonye njalo benqabela ukuthi kungangeni izigilamkhuba elizweni.
Uthe kuyajabulisa ukuthi ilizwe leMelika selithuthuka ngemfanelo okwamanje njalo likhengelelwe ukuthi liguqule kakhulu indlela zokungena bokuza kwele Melika.
UTrump ukhulume amazwi la ngoLwesibili ntambama eWashington DC edale leCongress lapho abasethula khona umbiko wakhe oqakathekileyo oweState of the Union Address.
Uthe abantu beMelika balakho ukwenza konke abakufisayo nxa besebenza ndawonye.
Uphinde wakhuluma okunengi ngokwenzakala kwele Melika esithi umnotho uthuthuka ngemfanelo.
UTrump uzitshaye isifuba ngokwehlisa umthelo we tax esithi lokhu kwenza ukuthi abantu bathole imali enengi okumangalisayo esale ezambeni zabo sebethathelwe umthelo lo.
Uthe amabhizimusi lawo sethuthuka okumangalisayo ngokwehliswa komthelo we tax.
Njengokukhangelelwe nguzulu, uTrump ubambe njalo udaba lwabantu bokuza, ikakhulu labo abakuhlelo olwethulwa nguhulumende kowayengumongameli uMnu. Barack Obama olwe Deffered Action for Childhood Arrivals. Lolu luhlelo lwabantwana aababuya labazali babo eMelika besesebancane abangalamaphepha okwamanje afunwa nguhulumende okuthi bahlale elizweni leli.
UTrump uthe kumele ibandla lama Republicans lelama Democrats asebenze ndawonye ukuze kulungiswe udaba lolu oluhluphayo lokunye okuhambelana lokuvimbela abokuza ababuya eMelika ngendlela ezingalunganga.
Uthi zinengi inhlelo okumele zilungiswe ezinjengokuphetha uhlelo lwe Diversity Lottery VISA.
Abakubandla lama Democrats akubajabulisanga ngitsho lakancane okwethulwe nguTrump. Omele ama Democrats uMnu. Joe Kennedy uthe uTrump ubezikhulumela nje.
Sixoxe lesizalwane seZimbabwe uMnu. Vukani Moyo ohlala eDallas Texas ngokwethulwe nguTrump.
Siphinde saxoxa njalo lesinye isizalwane seZimbabwe esihlala eMaryland, uNkosazana Sibongile Ncube.
Umbiko kaTrump owe State of the Union Address ngowokuqala ukuthi awethule edale leCongress.
