UMongameli Donald Trump wakwele Melika uthi balwisana labohulumende abancindezela uzulu abagoqela ilizwe leIran lele Venezuela lapho okwephulwa khona ilungelo likazulu santando.
Uthi abantu kumele bazilungisele amazwe abo kulokuthi bamelele ilizwe leMelika ukuthi libahlenge.
UTrump wethule amazwi la ngoLwesibili emhlanganweni weUnited Nations General Assembly eNew York kwele Melika, oqoqwe yinhlanganiso yamazwe wonke womhlaba eye United Nations.
UTrump uthe ilizwe leIran lephula ilungelo likazulu santando.
“Uhulumende wenkohlakali zakwele Iran uhlanyela ukungezwani, uyabulala abantu njalo ubhidliza konke okufiswa nguzulu. Kabahloniphi inkululeko yamanye amazwe. Inkokheli yakwele Iran yeba inotho yelizwe leli ukwenzela ukuzinothisa lokwenza kube lenzondano phakathi kukazulu. Benza lokhu kuzwekazi leMiddle East lakwamanye amazwe.”
UTrump uthi lokhu yikho okwenza ukuthi abantu bakwele Iran bevukela uhulumende lo othanda ukwenza kungabi lokungezwani emazweni atshiyeneyo.
“Abantu bavukela uhulumende lo ngoba inkokheli yakwele Iran yephula ilungelo labo, seyatshontsha amabhiliyoni lamabhiliyoni amadola isenzela ukuzinothisa.”
TEXT: Uthi lokhu lakho kwenza ukuthi ilizwe leMelika liphume kusivumelwano sokuvimba ukulolongwa kwezikhali ze-nuclear esethulwa ngowayengumongameli weMelika uMnu. Barack Obama.
Uthi isivumelwano lesi ese Iran Nuclear Deal senza ukuthi inkokheli yakwele Iran inothe okumangalisayo.
Uphinde wathi okwenzakala kwele Iran sokusenzakala njalo elizweni leVenezuela lapho uhulumende ancindezela khona abantu okumangalisayo.
“Okwamanje sibona izimanga kwele Venezuela lapho okulabantu abafika izigidi ezimbili ababaleka elizweni leli eliqhuba imikhuba ye-socialism. Uhulumende kaMaduro obasela nguhulumende wakwele Cuba. Okuyinto lokhu okuthiwa yi-socialism akusebenzi. Sokwabhidliza amazwe amanengi. Kwenza kube lenkohlakali emangalisayo njalo lokuncindezela uzulu.”
Uphinde wathi uhulumende wakhe kasoze asekele umthethwandaba weInternational Criminal Court ongahloniphi imithetho yamazwe atshiyeneyo.
“Ilizwe leMelika kalisoze linike imali njalo lisekele inhlanganiso yeICC ngoba kayilalungelo lokuthonisa amacala njalo lokwenza konke lokhu ekwenzayo. Inhlangaso yeICC yephula santando imithetho yamazwe wonke.”
UTrump uveze ukuthi sebefuna ukuthi lenhlanganiso ethengisa amafutha eyeOrganization of the Petroleum Exporting Countries kumbe OPEC ingathengisi amafutha santando okwenza ukuthi abelentengo ephezulu emazweni anjenga kwele Melika.
UTrump kakhulumanga lutho ngokwenzakala kuzwekazi leAfrica. Lokhu kutshiye abanye abantu besithi kalandaba lokwenzakala kuzwekazi leAfrica.
Omunye wabachothoza lokhu nguMfundisi Useni Sibanda othi uTrump kalandaba labantu bezwekazi leAfrica.
Ilizwe leMelika lafakela inkokheli yebandla leZanu PF izijeziso zenotho lisithi yephula ilungelo loluntu njalo yehluleka ukuqhuba ukhetho olubalulekileyo.
