Abantu kwele Melika bamelele ukuzwa okuzakwethulwa lidale leSenate elithonisa icala eletheswa uMongameli Donald Trump okuthiwa wayefuna ilizwe leUkrainne lingcolise igama likaMnu. Joe Biden, olakho ukuncintisana laye lonyaka.
Bakhulume kwazwela edale leSenate okwensuku ezimbalwa abafuna ukuthi uTrump ajeziswe njalo labaphikisa ukuthi ulecala lokuzama ukusebenzisa ilizwe leUkrainne ukuba lincedise ukukhankasela ukhetho oluzayo.
Bekhuluma emaphethelweni okuthoniswa kwecala leli, abamele ibandla lama Democrats bathi kusobala ukuba uTrump ucatsha ngomunwe ngoba wayefuna ukudlelana lelizwe leUkrainne ngendlela eziphansi.
UMnu. Adam Schiff, obekhokhela abathonisa uTrump bemele ibandla lama Democrats, uphethe ukuthoniswa kwecala leli ngoMvulo ngokuthi bangakhohlwa ukuba icala lembula ingubo lingene.
“Konke lokhu okuvezwe lapha kutshengisa ukuba ucatsha ngomunwe. Ulecala elinjengesono kodwa ngcono sekele abantu bakhulume ngalokhu ngokuvota. Iqiniso lizavela loba kanjani. Nomakanjani iqiniso lizavela kuphela.”
Kodwa amagqwetha kaTrump avimbe kwazwela. Omunye wabo nguMnu. Pat Cipollone othi abamele ibandla lama Democrats bazama ukuvimba ukhetho oluzayo ngoba besaba ukuthi uTrump enganqoba kukhetho lolu njengalokhu akwenza ngomnyaka ka2016 aze anqobe uNkosikazi Hillary Clinton.
“Kumele abantu abavotayo bakhethe umuntu abamfunayo.”
Lokhu kusekelwe ngelinye njalo igqwetha lika Trump, uMnu. Jay Sekulow.
“Kumele livule amehlo livikele amavoti abantu bekwele Melika.”
UMnu. Donald Trump laye uthi kuyayangisa okwenziwa ngabalandeli bebandla lama Democrats.
“Bazenzela santando. Kuyayangisa. Kuyangisa ilizwe leMelika. Abakubandla lama Democrats batshona begijimisana lalokhu ngoba kabenzi lutho. Baveza ukuthi bazonda abantu abavotayo. Lokhu kuyafana nje lokuzibulala okwenziwa libandla leli.”
Kukhangelelwe ukuthi abakubandla lama Republicans bazakwethula isigwebo sokuthi kalacala uTrump owamisa ukunika ilizwe leUkrainne izikhali esithi uzakwenza lokhu nxa umongameli wakulelolizwe engethula umbiko wokuthi sebehlolisisa okwakusenziwa nguHunter Biden owayesebenzela inkampani yomlilo kwele Ukrainne.
Kuthiwa inkampani le yayisenza ubukhohlakali lobanje lokhu kuphikwa ngabantu abanengi.
