Uhulumende uthi useqhatshe odokotela abangamatshumi amahlanu abadabuka kwamanye amazwe abakhangelelwe ukuthi bazasebenza ezibhedlela zikahulumende okulabodokotela abanengi abakhalala umsebenzi.
UNkosikazi Agnes Mahomva, usibalukhulu wohlangothi lukahulumende olwezempilakahle, uthi odokotela laba bakhangelelwe ukuthi bazafika eZimbabwe ngempelaviki. Lokhu kuvezwe encwadini elotshwe nguNkosikazi Mahomva oyilobele uhlangothi olubona ngokwethekelelwa kwelizwe leZimbabwe.
UNkosikazi Mahomva ucele uhlangothi lolu ukuthi luncedise ngokubona ukuthi odokotela laba abalankinga yokungena elizweni. Akwaziwa ukuthi uhulumende uqhatshe odokotela abadabuka kuwaphi amazwe njengoba incwadi le ingakuvezanga lokhu.
EleZimbabwe lidlelana lamazwe anjenge leDemocratic Republic of Congo, eleCuba lamanye alabodokotela abanengi abasebenzela ohulumende. Kasenelisanga ukukhuluma loMahomva kanye lomphathintambo wezempilakahle ngodaba lolu.
Odokotela sebelenyanga lamalanga ambalwa bekhalala umsebenzi eZimbabwe. Bafuna ukuthi uhulumende akhuphule iholo labo njalo athenge imithi lemitshina yokusebenzisa ezibhedlela zikahulumende ezibalisa eseMpilo Hospital, United Bulawayo Hospital, Parirenyatwa Hospital, Gwanda Hospital lezinye.
UDokotela Masimba Ndoro, isikhulumeli senhlanganiso yeZimbabwe Hospital Doctors’ Association, uthi kuyamangalisa ukuthi uhulumende ulemali yokuqhatsha odokotela yena engenelisi ukukhuphula iholo labo.
UDokotela Paulinus Sikosana, umngcinisihlalo wohlangothi oluqhatsha odokotela olweHealth Service Board, utshele umsakazo weStudio 7 ukuthi abakatshelwa nguhulumende ngodaba lokudinga odokotela kwamanye amazwe.