Kulabantu abayisitshiyagalolunye - 9 ababulewe ngumkhuhlane weCOVID-19 izolo eZimbabwe kwathi abafika phose ikhulu – 94 bahlolwe batholakala belegciwane leCOVID-19.
Uhlangothi lwezempilakahle luthi umkhuhlane lo usubulele abafika phose inkulungwane ezine lengxenye – 4,466 selokhu kwaqhamuka iCOVID-19 eZimbabwe.
Luthi kusukela ngoNhlolanja lonyaka sekulabantu abedlula izigidi ezimbili lengxenye – 2,698,632 asebehlathwe okwakuqala ijekiseni yokuzivikela kumkhuhlane lo.
Abedlula ingxenye yalaba sebehlatshwe ijekiseni yesibili. Emhlabeni wonke jikelele, isibhedlela seJohns Hopkins University sibika ukuba sekulabantu abedlula izigidi ezingamakhulu amabili – 220 million asebebanjwe ngumkhuhlane lo kwabhubha abedlula izigidi ezine lengxenye – 4,6 million emhlabeni wonke jikelele.
Lokhu kwenzakala sekumemetheka imikhakha etshiyeneyo yegciwane leCOVID-19 egoqela oweDelta, Alpha, Beta, Gamma leC.1.2, otholakala kwele South Africa lamanye amazwe.
Obona ngokuhlolwa kwemikhakha etshiyeneyo, uDokotela Raina Simbi, ongumqondisi weLaboratory Services eZimbabwe, utshele iphephandaba leSunday Mail ukuba umkhakha weDelta yiwo omemetheka okwedlula eminye eZimbabwe.
Uthi umkhakha weC.1.2 kawukatholakali elizweni.
USikhwicamfundo Solwayo Ngwenya, umqondisi wesibhedlela seMpilo Hospital, uthi kuqakathekile ukuzivikela kumkhuhlane weCOVID-19.