Kukhangelelwe ukuthi ijekiseni yeSinopharm enqunda umkhuhlane weCOVID-19 eyahluzwa kwele China izakwamukelwa yiziphathamandla zikahulumende kusasa eHarare ihlolwe okwamahola angamatshumi amane lasitshiyangalombili – 48 hours ingakahlatshwa abantu abagoqela abongi, odokotela labanye.
Abezempilakahle bathi lumuthi ngodingakala ngesiphangiphangi ngakho-ke ubhaliswe kuhlangothi lweMedicines Control Authority of Zimbabwe phansi kwesigaba okuthiwa yi-Emergency Use Authority kulandelwa isiqa somthetho esilawula ngezokungena kwemithi elizweni eseMedicines and Allied Subsantances Act.
Uhulumende uthi umuthi lo uzahlolisiswa luhlangothi lweMedicines Control Authority of Zimbabwe ungakasetshenziswa elizweni.
Uhulumende uthi sowahlolisisa imithi eminengi egoqela iSinopharm, owenziwe eChina, osukhethwe ngabogatsha lwezempilakahle ukuba usetshenziswe elizweni.
UDokotela John Mangwiro, umsekeli womphathintambo wezempilakahle, usanda kutshela uzulu ukuba umuthi lo ukhethwe ngemfanelo nguhulumende.
Kodwa owake waba ngumphathintambo wezempilakahle, uDokotela Henry Madzorera, uthi kumele uhulumende acace kuhlelo lwakhe lolu lokuthenga imithi evikela izizalwane kumkhuhlane weCOVID-19.
Kulabanye abantu abathi akuqedakali okwenziwa nguhulumende ngohlelo lokuhlaba uzulu ijekiseni yeSinopharm lamanye. Omunye wabo nguMnu. Sihlobo Nyathi, ohlala eMakokoba koBulawayo.
LoMnu. Mthandazo Ndlovu umangaliswa ngokwenzakalayo.
Uhulumende uthi abazaqala ukuhlatshwa ngabezempilakahle, asebekhulile labalemikhuhlane etshiyeneyo kulandele abezemfundo labanye. Okwamanje uhulumende uthi kuzakuba lamajekiseni afika phose isigidi – 600,000 azathengwa kwele China.
Lokhu kwenzakala ngesikhathi kulabantu abahlanu ababulewe ngumkhuhlane weCOVID-19 izolo kwele Zimbabwe kwathi abafika phose amatshumi ayisithupha -59 batholakale bele coronavirus.
Umkhuhlane lo sowabulala abantu abafika phose inkulungwane lengxenye – 1,398 eZimbabwe kusukela ngoZibandlela nyakenye.
USikhwicamfundo Solwayo Ngwenya, osebenza eMpilo Hospital, uthi kufanele uhulumende ahlole ijekiseni yeSinopharm ingakasetshenziswa elizweni.
