Amazwe amanengi asevimba abantu abavela eZimbabwe, Botswana, Namibia lamanye kulandela ukuqhamuka komkhakha omemetheka ngamandla oweCOVID-19, obizwa ngokuthi yi-Omicron.
Inkampani yezindaba eyeAssociated Press ibika ukuba amazwe asevimba izethekeli ezivela emazweni la agoqela eleBhilithani, New Zealand, Israel lamanye esabe ukuba ungaqhamuka umkhakha lo osanda kuvezwa ngele South Africa.
Kubikwa ukuba eleMelika liqala ukuvimba kusasa abavela eZimbabwe lamanye amazwe asemhlubulweni oweSouthern Africa kuzwekazi leAfrica. Umkhakha oweOmicron, omemetheka ngamandla, kubikwa ukuba ulakho ukutholakala ebantwini abahlatshwe ijekiseni yokuzivikela kumkhuhlane weCoronavirus.
EleSouth Africa lithi limangaliswa ngamazwe wonke alijezisela ukuba liveze umkhakha lo, olakho ukubulala abantu abanengi emhlabeni wonke jikelele.
Uhulumende wakwele Zimbabwe uthi abantu kumele bengethuki kakhulu ngoba uzimisele ukulwisana lomkhakha oweOmicron.
UDokotela Agnes Mahomva, osebenza ewofisini kamongameli leyeziphathamandla zikahulumende, uthi bazavimba ukumemetheka komkhakha lo omutsha ngokuhlaba abantu abanengi ijekiseni yokuzivikela kumkhuhlane weCOVID-19.
Inhlanganiso ebona ngomdlalo wekhilikithi eyeInternational Cricket Council ithi sebemise umdlalo oweWomen’s Cricket World Cup qualifier obuqhutshelwa eHarare ngenxa yokuqhamuka komkhakha lo. USikhwicamfundo Solwayo Ngwenya, osebenza esibhedlela seMpilo koBulawayo, uthi kumele abantu baqaphele umkhakha omutsha oweOmicron.
Uhlangothi lwezempilakahle eZimbabwe lubika ukuba kulomuntu oyedwa obulewe ngumkhuhlane weCOVID-19 izolo kwathi abedlula ikhulu – 115 bahlolwe batholakala belegciwane leCoronavirus.
Luthi kulabantu abedlula inkulungwane ezine lengxenye - 4,705 asebebulewe ngumkhuhlane lo kusukela nyakenye. Asebejovwe ijekiseni yakuqala yokuzivikela kumkhuhlane lo bedlula izigidi ezintathu lengxenye - 3.8 million kuthi njalo asebehlatshwe eyesibili bafika phose izigidi ezintathu - 2.8 million.
Emhlabeni wonke jikelele, isibhedlela seJohns Hopkins University sithi iCOVID seyabulala abedlula izigidi ezinhlanu – 5.2 million.