Abezempilakahle bakhuthaza abantu ukuba balandele iziqondiso zonke zokuzivikela kumkhuhlane weCOVID-19 ezifakwe nguhulumende ngesikhathi limemetheka ngamandla igciwane leCoronavirus eZimbabwe lemhlabeni wonke jikelele.
Inhlanganiso ebona ngezempilakahle emhlabeni wonke jikelele eyeWorld Health Organization ithi abantu abanengi kakhulu kuzwekazi leAfrica sebehlaselwa ngumkhakha wegciwane leCOVID-19 obizwa ngokuthi yiDelta variant obulala okumangalisayo.
UDokotela Matshidiso Moeti, umqondisi wenhlanganiso lekuzwekazi leAfrica, utshele iAssociated Press ukuka umemetheka ngamandla umkhakha lo kwele Zimbabwe, Algeria, Malawi lakwele Senegal obulala abantu abanengi.
Uthi kumele abantu balimuke umkhuhlane lo ngokulandela okwethulwa ngabezempilakahle.
Lokhu kusekelwa nguDokotela Xolani Ndlovu, ingcwethi kwezempilakahle.
UDokotela Ndlovu uthi kunengi okumele abantu bakwenze ukwenzela ukuzivikela kumkhuhlane weCOVID-19
Inhlanganiso yeAfric Centers for Disease Control ithi abantu abedlula izigidi eziyisithupha – 6,3 million sebehlolwe kuzwekazi leAfrica batholakala beleCOVID-19 kwabhuba abafika phose inkulungwane ezilikhulu lamatshumi ayisithupha – 159,719.
