Uyamemetheka kakhulu umkhuhlane weCOVID-19 eZimbabwe obulele abantu abafika phose amatshumi amabili izolo -18 ngesikhathi izibhedlela sezigcwala abantu koBulawayo abale coronavirus.
Odokotela labongi ezibhedlela ezitshiyeneyo bathi sibi isimo sezigulane ezilomkhuhlane weCOVID-19 ngoba sokuswelakala imibheda kwezinye ngenxa yenani eliphezulu labantu abalomkhuhlane lo, osubulele abafika phose inkulungwane ezimbili – 1,859 eZimbabwe selokhu kwaqhamuka iCOVID-19 ngoMbimbitho nyakenye.
Uhlangothi lwezempilakahle luthi kulabantu abedlula inkulungwane abahlolwe izolo batholakala belomkhuhlane weCOVID-19. Luthi sekulabantu abedlula inkulungwane ezingamatshumi amahlanu 53,665 asebehlolwe eZimbabwe batholakala bele COVID-19.
Abafika phose inkulungwane ezingamakhulu amane – 39,9792 sebephephe kumkhuhlane lo. Ukumemetheka kwegciwane leCOVID-19 kwenzakala ngesikhathi uhulumende esanda kwethula imigoqo emitsha yokuqinisa uhlelo lokuvikela uzulu kumkhuhlane weCOVI-19 olweLockdown. Umqondisi wesibhedlela seMpilo, uSikhwicafundo Solwayo Ngwenya, uthi kuyethusa okwenzakala kuzulu.
“Mahlabezulu umkhuhlane lo oweCorona, ubhubhane lolu esakhuluma ngalo kangaka, solumangalisa lapha ngoba indawo zokuthi abantu bathole imibheda sezizahlupha njalo seziqalisile. Yikho sixwayisa ukuthi lizibambe, lilalele lokhu esakukhulumayo. Nxa lokhe lingalaleli, lisenza isiminye minye, abantu bethatha umkhuhlane lowu bewunompola bephanana umemetheka usiya phambili. Kuzaze kufike isikhathi sokuthi abantu behluleke ukufika esibhedlela ngoba izibhedlela ziyabe zingasenelisi ukuthi zilikhangele.”
UMnu. Antony Majongosi, osebenza esibhedlela seUnited Bulawayo Hospital, uyakusekela lokhu.
Umqondisi wezempilakahle kukhansili yakoBulawayo wenqabe ukuthatshwa ilizwi kodwa uchaze ukuthi isibhedlela seEkusileni besilungiselela ukuvula ngoLwesihlanu olwedlulileyo okutsho ukuthi singabe sesivulile. Wenqabe ukukhuluma ngesimo esikwezinye izibhedlela ezikoBulawayo ethi yena ukhangelane lesibhedlela seThorngrove kuphela.
UMnu. Effort Ncube, olwelwa amalungelo oluntu, usola uhulumende ngokukhuphuka kwamanani labantu ababanjwa ngumkhuhlane weCOVID-19.
“Kulengozi enkulu esiyibonayo nje eye Covid19 isiba banzi yonke indawo, ikakhulu le i Delta variant. Isigcwala yonke indawo njengalokhu sikubona njengamanye amazwe.Lokhu kubangwa kakhulu yikuthi i government ayizange yenze amalungiselelo afaneleyo kanti ukubuswa kabi kwelizwe kudilize ezempilo, kwasweleka izibhedlela lakho konke. Akula mbheda, ama ventilators lezinto zonke ezingahlenga impilo yabantu. Kulengozi enkulu yokuthi abantu bacine befile ngento ebekufanelwe ivikelwe.”
Umongi, uNkosikazi Alice Songo, uthi konke lokhu okuvelayo kungenxa yokungalandeli iziqondiso zeCOVID-19.
“Siyakunanzelela ukuthi sesilahlekelwa yimiphefumulo yabantu,njalo banengi abantu abazakufa ngenxa yokungalandeli iziqondiso. Njalo ukungalandeli kuzenza ukuthi izibhedlela zigcwale, abantu baswele ukwelatsha. Siyakhuza ukuthi umuntu wonke ozizwa elomvimbano kahambe ayehlolwa, lokhu sisenzela ukuvikela abanye. Njalo nxa ulomkhuhlane, hlala ngekhaya njengokufundiswa ngabezimpilakahle.”
Umqondisi wesibhedlela seUnited Bulawayo Hospitals, uDokotela Narcissus Dzvanga, wenqabe ukuthatshwa ilizwi kodwa uchaze ukuthi ngaphandle kwemibheda engasilela ezibhedlela kukhona okunye okusetshenziswayo okufanele kube khona okugoqela amafutha ezimota, amanzi, ukudla, izisebenzi zempilakahle. Wengeze esithi lezi zonke izinto ziqakathekile ukuze banelise ukonga izigulane esibhedlela.
Kusukela ngeSonto edlulileyo kuze kufike ilanga layizolo koBulawayo besokutholakale abantu abale COVID-19 abedlula inkulungwane eziyisokhombisa - 7,447. Ababulewe ngumkhuhlane weCOVID-19 babe likhulu lamatshumi amathathu lane - 134. Kuviki eyaphela mhlaka 26 Nhlangula, kwabanjwa abantu abedlula inkulungwane ezine - 4390, kwabhubha abangamatshumi amahlanu lasitshiyagalolunye - 59.
