Odabuka eZimbabwe ohlala kwele India uthi kuyethusa ukubona abantu bebhubha ngobunengi babo elizweni leli ngenxa yomkhuhlane weCOVID-19.
UNkosazana Nomthandazo Nkomazana, osehlale eMumbai okwesikhathi eside lapho athengisa impahla etshiyeneyo, uthi kulabantu ababhubha bezihambela emigwaqweni kwezinye indawo zelizwe abacina betshiswa kanye kanye. Abantu bayatshiswa bengabhubha elizweni leli.
UNkomazana uthi indawo lapho ahlala khona isifakelwe imigoqo ephezulu eyokuvikela abantu kumkhuhlane lo, omemetheka kakhulu kwezinye izabelo.
Isibhedlela seJohns Hopkins University sithi kulabantu abedlula izigidi ezingamatshumi amabili – 20,2 million asebehlolwe elizweni leli batholakala bele COVID-19 kwabhubha abedlula inkulungwane ezingamakhulu amabili – 222,408.
Kubikwa ukuthi sokusilela amatanka alomoya okuphefumula oweOxygen, onceda abantu abahlaselwa ngumkhuhlane weCOVID-19.
UNkomazana utshele iStudio 7 Dube ukuthi sokulukhuni ukuhlala ezilweni leli.
