Odokotela eZimbabwe bakhuthaza abantu ukuthi bahlatshwe amajekiseni okuvuselela amasotsha omzimba alakho ukulwisana legciwane leCOVID-19 ngesikhathi kulabanye abantu abalokhu besithi kaluqedakali uhlelo lokuhlatshwa kukazulu amajekiseni anjenge Sinopharm, Sinovac lamanye.
Okwamanje uhlangothi lwezempilakahle lubika ukuthi kulabantu abedlula inkulungwane ezingamakhulu amane lamatshumi amabili - 428,135 asebehlatshwe okwakuqala amajekiseni okunqunda igciwane leCOVID-19 emizimbeni. Uhlangothi lolu luthi asebehlatshwe okwesibili bafika phose inkulungwane ezilikhulu - 92,164.
Umkhuhlane weCOVID-19 sowabulala abantu abedlula inkulungwane lengxenye – 1,567 eZimbabwe phakathi kwabantu abafika phose inkulungwane ezingamatshumi amathathu lasitshiyagalolunye – 38,260 abahlolwe kusukela ngoMbimbitho nyakenye batholakala bele COVID-19.
Loba kunjalo, kulabantu abathi kabasoze bahlatshwe amajekiseni ngenxa yokungacaci kohlelo lolu olulenyanga ezimbalwa lwasungulwa elizweni. Odokotela bathi kumele abantu bahlatshwe amajekiseni la ukwenzela ukuthi uzulu enelise ukuphila njengalokhu ayekwenza kungakaqhamuki umkhuhlane weCOVID-19.
UDokotela Rogers Magigo ngomunye okhukhathaza abantu ukuba bahlatshwe amajekiseni.
"Mina ngihlatshiwe ifirst vaccine ngangimelele ngikhangelele ukuthi kukhona okuzakwenzakala emzimbeni wami first 3 days kodwa ngangingatshintshanga lutho lobuhlungu lapha engangihlatshwe khona angizange ngibuzwe. Le-second vaccine akula engakubonayo engingathi ngamaside effects emzimbeni, ngiyakhuthaza laba abasayekethisa ukuhlaba ukuba babelezibindi bahlatshwe singasheshisisa sihlabe sonke impilo zethu zingabuyela kungabi le lockdown
UNkosikazi Debra Tshuma, ongumbalisi koBulawayo, laye uthi wahlatshwa njengo Dokotela Magigo.
"Mina ngokwami ngibone sekufanele ukuthi ngihlabe ngoba lokhu engangikukhangelele ebantwini abahlaba kudala akwenzakalanga okubesobala ukuthi akulanto embi ngevaccine le. Ngibona angani kuyinto enhle ukuthi abantu bafundiswe batshelwe ngevaccine le ngaleyo ndlela abantu abanengi bazahlaba sivikeleke sonke."
Kodwa uNkosikazi Sazini Mdlongwa, isakhamuzi sakoBulawayo, uthi kalalwazi ngokuhlatshwa ngakho-ke kunzima ukuthi akwenze lokhu.
"Mina angila lwazi ngamajekisini njalo ngiyazibuza imbuzo engelampendulo, ngiyezwa kuthiwa abalama BP labalale minye imikhuhlane bengahlabi dudkuduku uzwe kuthiwa sebehlaba. Akula muntu oseke wabuya kithi wasifundisa ukuthi ivaccination yakhona kuhamba njani kuhlatshwa abanjani njalo njani. Ngakho sigcwele ukwesaba ukuthi sihambe siyehlaba ngoba sisesaba ukuthi singagula.”
UMnu. Dalubuhle Ndlovu uyakusekela lokhu.
"ICOVID ingabe yavelela khonangale eyavela khona kodwa thina hayi lokhu okwe vaccine asizwanani lakho. Okwesibili, igovernment yeZimbabwe iyaqamba amanga ayisoze yakhuluma iqiniso. When it comes for ivaccine eyiyo ayisoze yapha abantu iqiniso, kungaze kuthiwe kulama side effects iZimbabwe ayisoze yathatha ama responsibility, example iSouth Africa iwithdraw ivaccine yeJohnson and Johnson mina ngizakuba ngowokucina."
Kulabantu abedlula inkulungwane ezingamatshumi amathathu lanhlanu – 35,620 eZimbabwe asebaphephe kumkhuhlane weCOVID-19 omemetheka okwethusayo kwamanye amazwe.
Isibhedlela seJohns Hopkins University sithi kulabantu abedlula izigidi ezilikhulu lamatshumi amahlanu – 152 million asebehlolwe batholakala bele Coronavirus emhlabeni wonke jikelele kwathi abedlula kancane izigidi ezintathu 3,2 million babulawa ngumkhuhlane lo.
