Umemetheka okwethusayo umkhuhlane weCOVID-19 koBulawayo okungenza ukuthi idolobho leli livalwe ngci kunsukwana ezilandelayo.
Umphathintambo kahulumende obona ngokwenzakala koBulawayo, uNkosikazi Judith Ncube, utshele iphephandaba leSunday News ukuthi kuzavalwa ngci nxa umkhuhlane lo umemetheka kakukhu edolobheni leli okulabantu abedlula amatshumi ayisikhombisa – 72 abasanda kuhlolwa batholakala belegciwane leCOVID-19.
Okwamanje, kulabantu abedlula ikhulu – 109 abalomkhuhlane lo koBulawayo. Uhlangothi lwezempilakahle luthi elizweni lonke jikelele, kulabantu abedlula inkulungwane eziyisificaminwemibili – 8,786 asebahlolwa batholakala belomkhuhlane lo. Abedlula inkulungwane eziyisificaminwemibili – 8,096 sebaphepha kuthi abafika phose amakhulu amabili lamatshumi ayisithupha – 257 sebabhubha.
Emhlabeni wonke jikelele, isibhedlela seJohn Hopkins University sithi kulabantu abedlula izigidi ezingamatshumi ayisithupha – 54 million – asebahlolwa batholakala bele COVID-19 kuthi abafika phose isigidi lengxenye – 1,313,000 sebabhubha.
Kwele Melika, umemetheka okwethusayo umkhuhlane lo osubanjwe ngabedlula izigidi ezilitshumi – 11 million wabulala abafika phose amakhulu amabili lamatshumi amahlanu – 246,000.
Inhlanganiso yeAfrica Center for Disease Control ithi kulabantu abafika phose izigidi ezimbili – 1,963,702 asebahlolwa batholakala bele COVID-19 kuzwekazi leAfrica.
Kunani leli sokwabhubha abafika phose inkulungwane ezingamatshumi amahlanu – 47,104 kwasila abedlula isigidi lengxenye – 1,7 million.
Ukuze sihlaziye okwenzakala eZimbabwe, sixoxe loSikhwicamfundo Solwayo Ngwenya, osebenza eMpilo Hospital, othi kumele abantu abalandele iziqondiso zokulwisana lomkhuhlane weCOVID-19.
