USikhwicamfundo Solwayo Ngwenya, umqondisi wenhlelo eMpilo Hospital koBulawayo, uthi abantu kumele beqaphele umkhuhlane weCOVID-19 loba kungani liyehla inani labatholakala bele coronavirus elizweni.
Ekhuluma labalaleli bomsakazo weStudio 7 ngoLwesithathu kuhlelo Zimbabwe Today – Asixoxeni, esilethulela enkundleni yokuxhumana eyeFacebook kukhasi leVOA Ndebele, uNgwenya uthe abanye abantu kabalandeli iziqondiso zohlelo lokuvalela uzulu ezindlini olweCOVID-19 lockdown, okwenza ukuthi kube nzima ukuvimba ukumemetheka kwegciwane lecoronavirus.
“Inani labantu ababanjiweyo labantu abasitshiyayo kungani liyehlile. Okwamaviki la adluleyo bekunzima kakhulu. Umkhuhlane wakhona unjalo. Uyenza engani uyayekethisa abantu labo besebelandela, ubesuvuka njalo. Khathesi asikwazi ukuthi uzahamba kumbe uzavuka njalo.”
UNgwenya uthi umkhuhlane weCOVID-19 uguquka sonke isikhathi okwenza kungabi lendlela ekhanyayo eyokuthi uzacina ngaphi ngokumemetheka kwawo.
“Abantu kumele benze khonokhu ukuthi bengahlangani bebanengi besenza amaphathi kumbe besiya emfeni bebanengi. Kumele begez’izandla nxa behlangana, begqoke ama face masks avala amakhala lomlomo. Abantu abathandi ukuvala amakhala. Bathand’ukuvala amakhala kuphela ngakho-ke sithi valani lamakhala.”
Uthe banengi abantu abathwele nzima ngokuvalelwe ezindlini kusenzelwa ukunqabela ukumemetheka emigwaqweni.
“Kunzima ngoba lami nginje ngiyavuka ekuseni ngisiyabona izigulane. Kodwa khathesi abantu nxa bephuma besiyathengisa okunye abangakunompola kungacina kuqeda impilo zabo. Abantu basebunzimeni sibili ukuba bayesebenza ithumbu liyabe lisitsho kodwa bengazuza lumkhuhlane bayenelisa ukuba betshone.”
UNgwenya uthi uhulumende kukhanya esithenjiswe ukuthi uzathola amajekiseni okuvimba ukumemetheka kwegciwane leCOVID’19.
“Abantu ngibaxwayisa ukuthi bengazi bagijima bethi bezwe kuthiwa kulamajekiseni besebeyekethisa, umkhuhlane uyababulala ijekiseni ingakafiki.”
Ephendula imibuzo yabantu abathi kuyethusa ukuhlatshwa amajekiseni okuvimba igciwane leCOVID-19, uNgwenya uxwayise uzulu ukuthi amajekiseni la kawabulali.
“Amajekiseni ahlala ehlatshwa abantwana nsukuzonke lapha evela eGeneva ayabe elungiswe yiWorld Health Organization. Nxa ijekiseni le ipasile ngale akulankinga. Iyahlatshwa abantu. Kukhanya abantu beqamba amanga enkundleni zokuxhumana ukuthi baphambanise abantu emakhanda ukwenzela ukuthi abantu bayale amajekiseni, abantu bezakufa bebanengi. Njengodokotela ngithi nxa ijekiseni ihlolwe khonale eGeneva kumele siyithathe.
Kulabantu abalitshumi lanhlanu – 15 ababulewe ngumkhuhlane weCOVID-19 ngoLwesibili kwathi abalikhulu lamatshumi amahlanu – 150 bahlolwe batholakala bele coronavirus eZimbabwe.
Okwamanje kulabantu abafika phose inkulungwane ezingamatshumi amane – 33,964 asebehlolwe kusukela ngoMbimbitho nyakenye batholakala bele COVID-19. Kunani leli, sebefika phose inkulungwane ezingamatshumi amathathu lengxenye – 27,391 asebephephe kumkhuhlane lo. Sokwabhubha abedlula inkulungwane ezimbili lamakhulu amabili – 1,269.
