Uhlangothi lwezempilakahle lubika ukuba kulabantu abane ababulewe ngumkhuhlane weCOVID-19 izolo eZimbabwe kwathi abafika phose inkulungwane – 801 bahlolwe batholakala bele Coronavirus.
Uhlangothi lolu luthi phakathi kwenani leli, abantu abangamatshumi ayisithupha – 60 abahlolwe batholakala bele COVID-19 bahlala koBulawayo.
Sekulabantu abafika phose inkulungwane eziyisificaminwemibili – 1,725 asebebulewe ngomkhuhlane lo eZimbabwe, okumemetheka khona ngamandla umkhakha wegciwane leCoronavirus obulala kakhulu. Loba kunjalo, abantu baya hambahamba njalo bayazisebenzela njenganhlalayenza.
UNkosikazi Ruth Dube, ohlala koBulawayo, uthi kunzima ukulandela iziqondiso zohlelo lokuvikela uzulu kumkhuhlane weCOVID-19.
“Abantu khathesi bathwele nzima ngoba abakwazi ukuthi i-curfew iqala nini plus abantu abanengi abala ama mask, yikho oku spreader iCorona. Njalo akula muntu otshela omunye ukuthi gqoka imask, bayazihambela nje. Njalo okunye yonaleya inumber efunekayo ezimfeni ayikho maintained lokhe kunjalo abantu besiba banengi. Angazi ukuthi kungathiwani ukuze abantu belandele imithetho yonale ekhulunywayo eye Covid19.”
UMnu. Thabani Ndlovu, laye ohlala koBulawayo, uthi aluqedakali uhlelo lukahulumende lokuvikela uzulu kumkhuhlane weCOVID-19
“I-Lockdown leyi thina asikwazi lokuthi vele ikhona njalo lendlela okuhanjiswa ngayo imibiko iyasiphica ngoba sibona kuphikiswana. So, into esiyikhalela kakhulu lapha yikuthi asikwazi siku localized lockdown na. Imibiko kayihanjiswa ngendlela eqondileyo lakhonokhu osekuvukile ebulenjini ukuthi wonke umuntu sekhuluma akufunayo, sicina singasakwazi ukuthi silandela okukhulunywa nguhulumende kumbe abomthetho.”
UMnu. Thembelani Dube, ilunga lekomithi yeBulawayo Progressive Residents Association, uthi abantu abasasebenzi kuhle ngendaba yokuphangisa ukuvalwa kwamabhizimusi.
“Abantu abazisebenzayo abasasebenzi kuhle ngenxa yokuthi isikhathi esiyiso abantu abathenga khona yisikhathi santambama soneso okuthiwa abantu batshayise ngaso babuyele ezindlini. Abanengi sebephila nzima ...”
UMnu. Antony Majongosi, umongi osebenza eUnited Bulawayo Hospital uthi abantu kabasalaleli umthetho wokuthi bazivikele yikho okwenza ukuthi kukhuphuke inani labathapha umkhuhlane weCOVID-19.
Umsekeli womphathintambo wezempilakahle, uDokotela John Mangwiro, wazise intathelizindaba namuhla ekuseni ukuthi sokuseduze ukuba osomabhizimusi bonke baveze ubufakazi bokuthi sebahlatshwa ijekiseni yokuzivikela kumkhuhlane weCOVID-19 ukuze baphiwe imvumo yokuvula amabhizimusi lokusebenza.
UMangwiro uchaze njalo ukuba idolobho lakoBulawayo kalifakelwanga imigoqo yokuvala idolobho ngehola lesithupha ntambama kusiya elesithupha ekuseni. Uchaze ukuthi umbiko wohlelo lolu wethulwa ngumongameli, umphathintambo wezempilakahle kumbe omunye ongabe ephiwe imvumo nguhulumende. Sokuleviki lengxenye amapholisa ebike ukuba sokule ‘curfew’ emalokitshini amanengi koBulawayo ngenxa yokumemetheka kwegciwane leCOVID-19.
