UChief Justice Luke Malaba sesole ukungagqitshwa kokwakhiwa komthethwandaba weGwanda Provincial Magistrates Court osuleminyaka efika phose amatshumi amabili usakhiwa.
UMalaba ubesedolobheni leGwanda ngoLwesihlanu ukwenzela ukuzibonela okwenzakalayo enkantolo eyakhiwayo.
UMalaba ebehamaba lomphathintambo obona ngezomthetho, uMnu. Ziyambi Ziyambi, kanye lobona ngokuthuthukiswa kwezabelo, uMnu. July Moyo, ubezobona okwenzakalayo kulumthethwandaba oqale ukwakhiwa ngomnyaka ka2004 kodwa kuze kube lalamuhla awukapheli ukwakhiwa.
Ekhuluma labonozindaba ngemva kokuqhutshwa komhlangano obungavunyelwa intathelizindaba, uMalaba uveze ukudana okukhulu esithi sekumele kuthathwe inyathelo elizakwenza ukuthi kuphethwe ukwakhiwa kwednawo le.
UMalaba uthi uke wavakatshela kulesisakhiwo kabili nyakenye ngemva kokuba inkampani eyeMutual Construction eyiyo eqhatshiweyo ukwenza lumsebenzi iphiwe imali yokwakha kodwa uyamangala ukuthi akula okuthatha indawo.
“Lokhu kuyasikhathaza thina ababona ngomthetho ikakhulu nxa sikhangele lesi sakhiwo esingaka njalo lokuthi siqakatheke kanganani ekwethulweni komthetho ebantwini kungakho kuqakathekile ukuthi sithathe inyathelo sisiya phambili.”
UMalaba uthi bazahlala phansi loyakhayo baphume lesinqumo kusasa ukuze umsebenzi wokwakhiwa kwalumthethwandaba uqalise.
UMnu. Ziyambi laye uveze ukukhathazeka ngokungagqitshwa komsebenzi lo esithi kuyamangalisa okwenzakala eGwanda ngoba kwamanye amadolobho afana leChinoyi umsebenzi wokwakhiwa komthethwandaba uqhubeka kuhle.
UMnu. Stanley Madamombe, ongumqondisi weMutual Construction, laye ongene lumhlangano kathandanga ukuxoxa lentathelizindaba esithi isivumelwano asibhalelana lohulumende asivumi ukuthi axoxe lathi.
Unobhala jikelele wenhlanganiso yezakhamizi zeGwanda, uMnu. Bekezela Maduma Fuzwayo, uthi zinengi inhlelo uhulumende angakazigqibi kulesisabelo.
“Silama projects amileyo anjenge ngeGwanda Polytechnic iJoshua Mqabuko eyaqalwa ukwakhiwa iOld Site ngo1983 lamuhla iNew Site lokhu emile amacrane akwenziwa lutho, iCourt yenaleyana sokuzwe kumele yakhiwa kutsha ngoba akwenziwa lutho, iBridge likaMtshabezi aliyenzwa lutho. Singabala amaprojects awegovernment eGwanda amileyo manengi kakhulu.
UMnu. Thandeko Zinti Mnkandla, owayengumeya wedolobho leGwanda, uthi bekungadingakali ukuthi uMalaba lequla lakhe basuke khonale esigodlweni bezobona isakhiwo esingakapheli.
“Okuswelakalayo ngabantu abozokwakha sifuna ukubona abantu bezokwakha hatshi ukuzobuka ingathi ngamatourist, indaba yetourism kuhulumende kayiphele, kakwenziwe izinto kungaphongukhulunywa ngazo abantu bezobuka ingathi ngabantu ababuka impompoma zaseFolosi kumbe amanxiwa aseZimbabwe angiboni ukuthi kuzanceda ngani , kuyanceda ngokudla imadlana yonaleyo ekhona, leyomali ngabe kuthengwe izamende isakhiwo saphela , sikhathele ngabantu abakhuluma ngomlomo bengenzi lutho.”
Lumthethwandaba ukhangelelwe ukunceda kakhulu ekuthonisweni kwamacala ngokuphangisa lapho uthe waphela.
