Intathelizindaba zeZimbabwe esezifakwe kusibanga sezisebenzi eziqakathekileyo kulandela isinqumo esethulwe ngumthethwandaba ngesikhathi ilizwe libhekane lodubo lomkhuhlane weCOVID-19 kodwa zisebenza zingela mpahla yokuzivikela.
Lokhu kuphume ngoLwesihlanu ngesikhathi eleZimbabwe limanyana lamanye amazwe womhlaba ekunanzeni ilanga lezisebenzi eleInternational Workers Day.
Isiphathamandla senhlanganiso ebona ngamalungelo entathelizindaba eyeMedia Institute of Southern Africa- Zimbabwe, uMnu. Clarence Siziba, uthi lokhu kuthwalisa nzima intathelizindaba ezihlukunyezwa njalo ngamapholisa.
“Inthathelizindaba ziyahlukuluzwa ngesikhathi beloba ngeCovid-19. NgoMabasa sibe lentathelizindaba eziyisithobaminwe mibili ezahlukuluzwayo njalo leli nani liphansi ngoba ayisibo bonke abasazisa ngokuhlukuluzwa kwabo. Kusenjalo, ngalesisikhathi sinanza ilanga lezisebenzi intathelizindaba zisebenza zingela mpahla yokuzivikela. Kudingakala impahla yokuvala umlomo, amakhala kanye lamagcobo okuzivikela.’’
Isikhulumi sebandla leZAPU, uMnu. Iphithule Maphosa, uvumelane loSiziba.
''Kulusizi uma bengatholi limpahla yokuzivikela kulo umkhuhlane ngoba uyingozi. Uhulumende lamamankampani abawasebenzelayo kumele babatholise impahla yokuzivikela kulo umkhuhlane oyingozi ngesikhathi besebenza.’’
Umqoqi wenhlelo kubandla leMthwakazi Republic Party, uMnu. Patson Xaba, uthi kuyadanisa ukubona abantu besebenza bengela mpahla yokuzivikela ukubamba iCOVID-19.
‘’Lamhlanje sikhumbula usuku lwezisebenzi kuhlangane lomkhuhlane weCovid-19 kodwa kuyadanisa ukubona abantu basebenza bengela mpahla yokuzivikela ukuvimba lumkhuhlane. Uhulumende usetshengise ukuthi kanakekeli abantu, ulobugovu.’’
Isikhulumi sebandla leMDC Alliance uMnu Swithern Chirowodza uthi kubalulekile ukuba iNtathelizindaba zitholiswe impahla yokuzivikela ukubamba iCovid-19.
“Kuqakathekile ukuba intathelizindaba lazo zitholiswe impahla yokuvikela iCOVID 19 ngoba bangena endaweni ezitshiyeneyo kubalulekile ukuba batholiswe lezi mpahla ngoba lumkhuhlane awukhethi.’’
Embikweni owethulwe ngunobhala wogatsha lwezokwethulwa kwemibiko, uMnu. Nick Mangwana, olotshwe enkundleni yokuxhumana eyebulenjini beTwitter,uthe uhulumende uyaqakathekisa intathelizindaba ukuba besebenze bekhululekile bengahlukunyezwa.