Kukhangelelwe ukuthi kusukela kusasa elizweni lonke abanye abongi bazahlatshwa ijekiseni yokuvimba ukumemetheka kwegciwane leCOVID-19 eyeSinopharm lobanje kukhanya engani kulabanye abakhonona ngohlelo lolu, oluphawulwe ngeviki ephelileyo ngumsekeli kamongameli, uMnu. Constantino Chiwenga.
Ijekiseni le isinikwe izabelo zonke eZimbabwe kulandela ukusungulwa kohlelo lokuhlaba abantu kusetshenziswa ijekiseni yeSinopharm. Kodwa abanye abongi bathi kabazi lutho ngohlelo lolu koBulawayo ngakhoke kabasoze behlatshwe ijekiseni le.
UMnu. Antony Majongosi, ongumongi esibhedlela seUnited Bulawayo Hospitals njalo ongumgcinisihlalo wenhlanganiso yabongi eyeZimbabwe Nurses Association, uthi kabakafundiswa lutho nguhulumende ngohlelo lolu langokusetshenziswa kwejekiseni yeSinopharm.
"Indaba ye-vaccine leyi thina asikwazi ukuthi iyasincedisa njani. Thina sifuna ukuthi siqale sifundiswe ukuthi injani ukuthi siyithole kodwa singakafundiswa asingeke siyithole."
UNkosikazi Rebecca Nyoni, ohlala koBulawayo, ulombono ofanayo.
“Uhlelo lokuhlatshwa kwabantu asiluzwisisi ngoba akulamuntu ongaphombu kuhlatshwa umkhuhlane ongawaziyo akwenzi of course siyakwazi iCOVID ikhona. Akuhlatshwe esibhedlela oyabe eyibanjiwe, ngokuya kwesikhathi nxa ivaccine isingene emzimbeni abanye abantu baya reactor ngokuya kwesikhathi kuyabe sekulomkhuhlane emzimbeni.”
Kodwa kulabanye abantu asebezwile ngohlelo lolu. Omunye wabo nguMnu. Mkhokheli Ndlovu.
“Sizwile ukuthi ivaccine ibuyile koBulawayo abantu bazaqala ukuhlatshwa kusasa sithemba ukuthi ama essential workers azaqala ukuhlatshwa kuzadala ukuthi kube lomahluko wokumemetheka kweCOVID. Siyakwamukela lokho. Mina ngedwa ivaccine angiyifuni ngibona angani ngihealthy, angiyidingi ivaccine.”
Esinye njalo isakhamuzi sakoBulawayo, uNkosikazi Melissa Sibanda, uthi kulicebo elihle ukuhlatshwa ijekiseni le.
“Ukuhlatshwa sikulindele sibili okokuthi ngabe abantu bayafundiswa wonke umuntu ahlabe kaone ngibona angani kungcono abantu bahle bahlale belungiselele. Izinto ezinje zingcono nxa abantu besenza kaone lokuvikeleka kungaba lula”
UDokotela Rodgers Magigo uthi ukuhlatshwa amajekiseni kuqakathekile ngoba kuyancedisa amasotsha omzimba.
“Ivaccine iqakatheke ngempela ngenxa yokuthi singakwanisa ukuthi sivaccinate sibesesi achieve leyi esingathi yi-herd immunity yokuthi phose 80% of population yethu, siyabe sesilomhlobo weprotection against COVID-19. Singacina sibamba iCOVID but ngenxa yokuthi siyabe sesilamasotsha omzimba akwanisa ukuthi asivikele ama effects akhona ayabe esemancane. Mina njenge health worker lamanye sesilungele ukuthi sithole Ivaccine sihlatshwe sibe protected.”
Abantu abafika phose inkulungwane ezingamatshumi amathathu lasithupha – 35,768 sebehlolwe batholakala bele COVID-19 eZimbabwe kusukela ngoMbimbitho ngomnyaka ophelileyo. Kunani leli, kulabedlula kancane inkulungwane ezingamatshumi abathathu lambili – 32,000 asebephepha kumkhuhlane lo elizweni.